Shillong, Naiwieng 21
Ka NITI Aayog ka la pynthymmai biang ïa ka jingpyrshang jong ka ban pyntyllun ïa ka roi ka par ha Meghalaya hadien ba u dkhot (jong ka), u Dr. Arvind Virmani u la pynkut noh ïa ka jingwan jngoh kaba ar sngi jong u kaba kynthup ïa ki jingïamir-jingmut bad 6 ngut ki ophisar Sorkar, ki nongïalam ka imlang-sahlang, lem bad ki kynhun khaïi napoh ka thaiñ.
Ka jingwan jong u Dr. Virmani ka pynleit jingmut na bynta ban pynsted ïa ka jingroi jong ka Meghalaya lyngba ka rep ka riang kaba neh, ka jingpynheh ïa ki karkhana rep, ka jingkynthup lang kaba khlaiñ ha ka liang ka pisa-tyngka, bad ka jingpynïaid pisa kaba kham bha. La buh jingmut ruh ban kyntiew ïa ka jingpynroi ha ka sap ka phong ba la pynshong nongrim ha ki lad kamai jong ka thaiñ, khamtam eh na ka bynta ki samla bad ki kynthei.
Ka jingpynkhlaiñ ïa ki lad pynïasoh ‘digital’ ha ki jaka ba jngai ka la mih ruh kum ka jingthmu ba kongsan-ba la shim ba ka long kaba donkam na ka bynta ban pynkupbor ïa ki Farmer Producer Groups (FPGs), Self-Help Groups (SHGs), bad ki nongseng kam ha ki nongkyndong. Ki jingïakren ki la khmih bniah shuh-shuh halor ka jingkiew jong ka ‘Early Childhood Development Mission’, ka bynta kaba kongsan jong ka saiñdur ba ïadei bad ka ‘Human Development’ jong ka Jylla.
Na ka liang u Dr. Virmani u la leit jngoh ruh ïa ka ‘Shillong Literary Festival’ ban ïakren bad ki nongtrei kti bad ki nongseng kam lajong, bad u la khmih bniah ruh ïa ka jingtreikam jong ka ‘Eastern Ri Bhoi Farmer Producer Company’ ban sngewthuh ïa ki jingeh ba ki kynhun nongpynmih mar rep ki ïakynduh.
U Dr. Virmani ha ka Sngi Thohdieng u la ai ruh ïa ka jingkren kum u Kongsan ha ka jingïalang ba 12 jong ka ‘International Conference on Sustainability’ (SUSCON XII) ha IIM Shillong.
U la ïasam ïa ka jingïohi ba kongsan halor ka lynti ïaid jong ka India sha ka ‘Viksit Bharat’, da kaba ban jur ïa ka jingdonkam jong ka jingïatreilang hapdeng ka Sorkar, ki kynhun ‘riew shimet, bad ki seng trei mon sngewbha ban kynjoh ïa ka jingroi kaba kynthup lang bad kaba neh.
Haba kren halor ka phang “Decarbonising Development”, u Dr. Virmani u la pynpaw kumno ka India ka lah ban pyndonkam ïa ki jingkylla ha ka jingbun briew, ka jingkylla ha ka lad pynïasoh ‘digital’, bad ki lad ki lynti ban pynsted ïa ka jingïaid lynti jong ka India ha ka roi ka par.
U la ong ba ka NITI Aayog ka angnud ban ïatreilang bad ki shlem pule kum ka IIM-Shillong ban saiñdur ïa ka lawei kaba neh bad kaba roi jong ka ri India.
Shuh shuh ka NITI Aayog ka la pynpaw biang ïa ka jingkular jong ka ban pynskhem ïa ka jingïatreilang bad ka Meghalaya kumjuh ban plie lad ha ka liang ka ïoh ka kot jong ka Jylla, ban ïaid shakhmat bad ka roi ka par kaba neh, kumjuh ban kyntiew ïa ka jingmanbha ha ka jingim na bynta ki briew jong ka.
