Shillong, Naiwieng 21
Ka Commisionerate of Food Safety, Meghalaya ka la pynbna paidbah sha baroh ki nongïa shimbynta ba dei ban wengnoh mardor ïa ka kyntien ba la thoh “Jingdih ORS” lane ba pyndonkam ïa ka kyntien ORS kiba ïalam bakla ha baroh ki dukan, ki pharmacy bad ki clinic jong ki doktor ha ka Jylla.
Ha ka kyrwoh ba la phah da ka Deputy Commisioner (Food Safety) ka Kong DBS Mukhim, ka la bthah ïa baroh ki nongdie (wholesaler) bad ki nongsam (distributor) ba ki dei ban phah pynphai biang ïa kum kine ki mar bad ban pynphai pat sha ki nongshna, ba kin ai kyrteng thymmai katkum ka jingbthah ka FSSAI.
Ka la bthah ruh ba kin bud ïa ka Standard Operating Procedure (SOP) ba la pynmih ban lah ha kaban lapdien pura shano ki mar ki poi.
“Ka jingpyntreikam bad jingkhmih ïa kane ka kam yn hap ban leh da ki ophisar ba la buh bad ki Food Safety Officer ha baroh kawei ka Jylla,” la bynrap ka Kong DBS Mukhim.
Shuh shuh ka la ong “Kane ka jingleh ka long katkum ka jingpyntreikam ban bud ryntih ïa ka hukum ai jingpynshai jong ka FSSAI ba pynmih ha ka 15 tarik Risaw, 2025, kaba ong ba kum kine ki jingdih ki dei kiba ai kyrteng thok bad ïalam bakla, namar kim shym la kot ha ka rukom shna jong u Oral Rehydration Salts (ORS) hapoh Food Safety & Standards Regulations.
Ka la pynshai ruh ba u ORS u dei u mar sumar jingpang bad ym lah ban shu die bad pynïaid ïew kum ki jingdih kai.
“Kino-kino ki mar ba pyndonkam ïa ka kyntien ‘ORS’ ha ka sop thoh kyrteng ban ïadih paidbah ka dei kaba ai kyrteng thok bad ïalam bakla bad dei ban weng noh na ki ïew, ki Pharmacy bad ki Clinic khlem ka jingpynslem,” ka la ong.
Ka Commissionerate ka la kyntu ruh ban ai ka jingïa treilang ba pura ban pynthikna ba ki nongthied kin ïoh ïa ka jingïada na ki jingshah ïalam bakla bad ki mar ki bym bha.
