Ka donkam ka jingai jinghikai ïa ki khynnah ba kin tip kumno ban ieit para briew bad ban leh ki kam kiba bha, ki bym pynlehraiñ ïa ka imlang ka sahlang. Kaba kham kongsan eh ka long ba dei lyngba ki skul kin shim khia bad ai jinghikai ïa ki khynnah ba kin long kiba sngewrit bad kiba jai jai ba kin ïoh kino kino ki kam kiba pynsngewtynad ïa ka imlang ka sahlang.
Lada lah ban ai jinghikai ïa ki khynnah ha kata ka rukom ba kin tip bad burom ïa kiba halor bad ïa kiba kham san kan ïarap ïa ka lawei ka jingim jong ki. Ki skul kim dei ban hikai tang ïa ki kot ki sla, hynrei ki dei ban ai jinghikai ba kin long kiba im tip briew tipBlei ym tang ba kin nang kot nang sla bad nang-thoh nangtar. Kumjuh wat ki Balang ruh ki dei ban ai jinghikai ïa ki khynnah ba kin leh ïa kaba bha bad kyntait ïa kaba sniew. Ym dei ban hikai tang ïa u Blei. Namar ïa u Blei ym don ba tip ym don uba lah ban ïohi. Hynrei ki balang ki dei ban ai jinghikai ïa ki khynnah ba kin koh-nguh sneng ïa ki kmie ki kpa bad kin ieit ïa ki para marjan marpa bad kin kiar ka bishni ka pihuin, ka thok ka shukor bad ka sakhi lamler para briew bad kin kynmaw de ïa u Blei ha ka jingim jong ki. Kane ka jingai jinghikai kan ïarap ïa kiba dang khie dang san ba kin tip ïa ka akor ka burom para briew. Kane ka long kum ka ksiar ka rupa ha ka jingim jong ngi ki briew.
C. B. Iawphniaw
