Jowai, Naiwieng 21
U Symbud Myntri Rangbah ka Jylla, u Bah Sniawbhalang Dhar ryngkat ka jingsynran lang u Myntri ka tnad ka koit ka khiah, u Bah Wailadmiki Shylla ha ka 21 tarik Naiwieng ki la leit ban jurip ïa ki projek kam pynroi ha sor Jowai.
Kane ka jingleit jurip ka la sdang na ïew Ïawmusiang, ka projek kaba la sahteng mynta la bun-bun snem bad kaba la ïaid shaid-shaid hapoh ka Sorkar MDA bad ïa kaba la mang ha ka jinglut kaba kot T.25.6 klur.
U Symbud Myntri Rangbah u la pynpaw ka jingsngewhun halor ka jingïaid shakhmat jong ka kam bad ong, “Ka jingpyntrei ïa ka Ïawmusiang ka la dep haduh 78%. Ka projek ka la don ha ka lynti ban pyndep noh ha u snem ban wan. Ïa baroh ki jingeh jong ki nongkhaïi yn sa pynbeit mar ïa dep kane ka jingtei.”
Kane ka jingleit jurip ka kynthup ruh ïa ka Working Women’s Hostel kaba la mang T. 27 klur bad ka Mini Secretariat Complex kaba kynthup ïa ka Block West, East bad North. Ka West Block ka dei kaba la mang ha ka jinglut kaba T.20 klur, bad kaba la jan dep artad, katba ïa ka East bad ka North, yn sa pyntrei ha ka rukom ba la pynbeit. Ka jingpyntrei ïa ka Mini Secretariat ka la dep haduh 90%.
Halor ka jingpynbiang jaka ïa ki nongshong dukan ha Ïawmusiang, u Symbud Myntri Rangbah u la ong, “La shim ïa ki sienjam ban pyntikna ba baroh ki nongshong dukan kin ïoh jaka ha kane ka ïew. Lada ki dang don shuh kino-kino ki jingtyrwa ba la bynrap, ngin bishar bniah ïa ki. Hadien ba la pyndep ïa ka DPR kaba nyngkong, yn sa khmih bad pynbeit ïa kino-kino ki jingduna.”
Na ka liang u Myntri ka tnad ka koit ka khiah, u la bynrap, “Kane ka dei ka jingdon-jingem jong ka JHADC. Hadien ba la pyndep, yn aiti ïa ka sha ka Council ha ryngkat ka jingpynbeit kaba biang na ka bynta ki nongkhaïi.”
Kane ka jingleit jurip ka pynpaw ïa ka jingkut jingmut jong ka Sorkar ban pynim biang ïa ki projek kiba la sahteng, bad ban pyntikna ban pyndep ïa ki ha ka por kaba biang bad ruh ban pynbiang ïa ki jingtei ki ban pynmyntoi ïa ki nongshong shnong bad ki nongshong dukan ha sor Jowai.
