Shillong, Naiwieng 21
Ka Khasi Students Union (KSU) Lawsohtun Unit ha ka 21 tarik Naiwieng 2025 ki la leit ban ïakynduh ïa u SDO ka ophis MEPDCL ban ai da ka dorkhas ban pynsngew halor ka jingbym treikam shuh ki jingpynshai ba la pynïeng harud surok (streetlight) hapoh shnong Lawsohtun kaba buh ka jingbymshngaiñ shuh ïa kiba ïaid ba ïeng ha ki lynti ki syngkien.
Haba ïoh ban ïakren bad u samla Lasterwell Rynjah uba dei u President KSU Lawsohtun Unit u la ïathuh ba ka seng ka la ïoh ka jingujor na ki katto katne ki nongshong shnong ba ki bun ki ‘streetlight’ kim treikam shuh, kumta ka buh jingma bad kam long shngaiñ ïa ki briew ba ïaid ba ïeng bad khamtam ïa ki khynnah ba leit khreh kot namar ka jinglip kine ki ‘streetlight’.
U la ong hadien ka jingïakynduh ïa u SDO u la ïathuh ba ïa kane ka kam kadei ban peit ka “smart city” hynrei kumba ka seng ka la ïoh jingtip ka “smart city” ka la dep thet kti.
Kumta na ka liang u SDO u la ong ba un sa phah briew ban shna ïa kine ki ‘streetlight’ kiba kham donkam eh bad lashai hi un sa phah ban peitbniah ïa kitei ki ‘streetlight’ ha ka por janmiet.
U la ïathuh ba ka shnong ka ju siew man u bnai hynrei sngewlyngngoh ba kine ki ‘streetlight’ ki lip noh ka bym long shngaiñ ïa ka ïaid ka ïeng jong ki khynnah.
