Moscow, Naiwieng:
Ki shipai ka Russia, ha ka Sngi Palei ki la kam trai ba ki la ioh kurup sa ia kawei pat ka nongbah Kupiansk jong ka Ukraine, kaba long ka thaiñ ba kongsan tam ia ka Ukraine, sha ka phang Mihngi jong ka thaiñ Kharkiv, ha kaba ki shipai ka Russia ki la ïakhun shitom baroh shi katta ban ioh knieh bad kurup ia katei ka bynta jong ka Ukraine.
La iathuh ba ka Ukraine, ka la ioh biang ia ka jaka pdeng lynti rel, ha ki bnai Nailur, hadien ba katei ka thaiñ ka la shah kurup ha ki shipai jong ka Russia naduh ka sngi ba nyngkong jong ka jingleit hiar thma jong ka Russia ha u snem 2022, hynrei ha kine ki bnai ba ladep, ki shipai jong ka Ukraine, ki la don ha ka kjat ba shadien, ha shilynter ka lain ba shakhmat jong katei ka thaiñ bad la ong ba ki la ioh kurup biang ia katei ka bynta ba ka Ukraine ka la duh noh baroh shi katta.
Ki shipai jong ka Russia “ki la pyndep ïa ka kamram hapoh ka nongbah Kupiansk”, ong u Sergei Kuzovlev, u nongïalam jong ka kynhun shipai jong ka Russia, ha u President Vladimir Putin, katkum ki jingkynthoh ba la pynbna ha ka telebishon. U la ong ruh ba katei ka nongbah ka long kaba kongsan haduh katta ia ka Ukraine, ba kan lah ban ïada ia kiwei pat ki bynta jongka.
Kane ka khubor ka long ruh ha kane ka por ba ka Ukraine ka la pdiang paidbah ïa ka jingtyrwa jong ka US ban pynkut noh ïa ka jingïakynad, kaba katkum ka tyllong khubor ba rangbah ba la pyntip shaphang kane ka jingthmu lane ka ‘draft’ kaba la ïakren bad ka US, ka la paw ba ka pynkynmaw ïa ki jingdawa ba heh tam jong ka Russia ïa ka Ukraine ban aiti noh ïa ki jaka ba la synshar mynta da ka Russia bad ba kin long trai hok beit noh da ka Russia.
