Shillong, Naiwieng 21
Ka kam ri Dohkha ha ka Jylla ka la long kawei na ki kam ba la nangroi katba nang mih ki sngi, kaba la pynlong ïa ki briew ha kylleng ka Jylla ban phai khmat sha kane ka kam, kaba la long ruh ka jingkyntiew ïa kam ri dohkha ha ka Jylla nalor ban pynneh pynsah ïa ka rukom ri dohkha.
Ka ophis Directorate of Fisheries, Meghalaya ka la pynlong ïa ka jingrakhe ïa ka ‘World Fish Day’ ha ka sngi Thohdieng ha khmat ka ophis treikam jong ka, kaba don ha Cleve Colony, Shillong ha kaba u Myntri ka tnad Fisheries u Thimothy D Shira u la wan ban ïashimbynta kum u kongsan ha ka jingdon ryngkatlang u Principal Secretary ka tnad u Harish Chandra Chaudhary, ka Directorate ka Dr AL Mawlong bad kiwei-kiwei.
U Thimothy haba ai jingkren ha ka jingïalang u la ong ba ka jingrakhe ïa kane ka sngi kyrpang ka long ruh shi bynta ban nang pynshlur shuh-shuh ïa uwei pa uwei u nongri dohkha ha ka Jylla ban kham pynleit jingmut ha ka kam ri dohkha, namar ka kam ri dohkha ka la long kawei na ka kam ba la sdang kiew bha ha ka Jylla.
Shuh-shuh u la ong ba, ka Jylla ka donkam dohkha kumba 35 hajar metric tonne ha ka shisnem bad ka Sorkar lyngba ki skhim ka pynshlur ïa ki nongshong shnong ban ri dohkha na ka bynta ban pyndap ïa ka jingdonkam ka Jylla.
Haba ïakren bad ki nongri dohkha ki la pynpaw ba ka kam ri dohkha ka la kiew shibun bad ka la ïarap ruh haba ïadei ban pyndap pynbiang ïa ki jingdonkam ha ïing ha sem namarba ki ïoh ban die ïa ki dohkha ba ki ri, kumjuh ruh ki la pynpaw ba ka Sorkar ka la ai ki jingïarap lyngba ki skhim bapher-bapher na ka bynta ki nongri dohkha.
Ha kane ka sngi la sam ruh ïa ki khusnam sha ki nongri dohkha kiba wan na kylleng ka Jylla, namar ka jinglah jong ki ban pynmih bad ban ri ban sumar ïa ki pung dohkha.
