Shillong, Naiwieng 21
U Bah Kordorlang Lyngdoh Nongpiur ha ka 21 tarik Naiwieng 2025 u la mih shakhmat ban pynpaw ïa ka jingsngewkhia halor ka jubab RTI ba u la ïoh, haba ïadei ka jingthungkam ka Raid Laban Secondary School ïa ka kam Assistant Teacher jong ka Pre-Primary, kaba la ïaid lait katkum ka ‘advertisement’.
Haba kren sha ki nongthoh khubor u Bah Kordorlang Lyngdoh Nongpiur u la ïathuh ba u la pan RTI ha ka 9 tarik Risaw bad u la ïoh pdiang ïa ka jubab RTI ha ka 5 tarik Naiwieng 2025, kaba kdew ba ka Samla Darisha Samanta T Lyngdoh, ka la shah jied napdeng kiba la thep ïa katei ka kam bad kiba la pyndep ïa ka ‘interview’.
Ka Raid Laban Secondary School ha ka jubab RTI ka la kdew ba ka Samla Darisha ka dei kaba la pyndep ïa ka klas XII bad ong ba ha ka ‘advertisement’ la kdew ba kiba aplai ki lah ban dei kiba la pyndep ïa ka Nursery Teacher Training (NTT) lane Diploma in Elementary Education (D.El.Ed) hynrei ïa kane la shim rai bad jied na ka jinglah ban leh bha ha ka ‘interview’.
U Bah Kordorlang halor kane u la pynksan da kaba ong ba kane ka jingleh jong ki bor pynïaid skul ka la pynduh ïa ka hok jong kiwei pat ki samla ba la pyndep ïa ka klas XII, kumjuh ïa ka NTT/D.El.Ed kiba la thep ha katei ka kam.
Shuh-shuh u la ong, watla ki bor pynïaid skul ki la pynshai ïa ka jingshah jied ka samla Darisha, hynrei u la dawa ban wengkam noh ïa ka bad ban thung ïa ki samla kiba la pyndep ïa ki kyrdan pule kumba la pan ha ka ‘advertisement’ namar ba ïa ka tulop la siew da ki paidbah, ym na ka pisa jong ki nongpynïaid skul.
Haba kylli, u la ïathuh, ba kiba thep ïa katei ka kam ki don haduh 4 ne 5 ngut bad kiba la pyndep ruh ïa ka kyrdan pule kumba la kdew ha ka ‘advertisement’.
U la kyntu ïa ka bor pynïaid skul ba ka dei ban pyrkhat ïa ka jingbha ka pule puthi ki khynnah pule. Namar ka jingthungkam ïa ka Samla Darisha ka samla bym pat biang ka kyrdan jingtip, ïoh ka ktah ïa ka lawei jong ki khynnah pule.
