Jowai, Naiwieng 21
Ka hat-trick ba la thep da u Rio Myrboh ka la biang pura ïa ka Nongkhroh Mawsiang ba kan khur ïa ka jingjop bad ban rung sha ka final ha ka lympung ïalehkai 1st Division Football Tournament ba la pynïaid da ka Thadlaskeiñ Sports Association (TSA) ha ka sngi Ba-ar ha Multi Sports Complex, Wahïajer.
Kane ka jinglah ban pynthikna ka la wan hadien ba ka la pynliem ïa ka Khliehtyrshi SC da 5-1 kol. Tang mar ïasdang ka jingïalehkai ka Nong-khroh Mawsiang ka la ïoh ban thep ar kol lyngba u Snowel Kharsati ha ka minit 2 & 5. Hadien shiteng kynta kane ka kynhun ka la pynbud biang ïa ka kol kaba lai lyngba u Rio Myrboh ha ka minit 34. Une u rangïalehkai shakhmat u la thep biang sa ar kol ha ka minit kaba 36 & 44 na ka bynta ban khur syndon ïa ka hat-trick bad ban pynlong ïa kane ka kynhun ban tam haduh san kol ha ka kylla step.
Hadien katto katne por ba la bteng ïa ka jingïa-khun jong ka kylla miet, ka Khliehtyrshi ka la lait thaw na ka jingshah brut ha kaba ka la ïoh ban pynphai kylla shi kol lyngba u Samehi Ryngkhlem (79) hashwa ba kan mad ïa ka jingshah rem.
Te kumta ka Nong-khroh Mawsiang kan pynkhreh ïa ka jingïakhun final ha ka 24 tarik mynta u bnai pyrshah ïa ka Larnai SC.
