Shillong, Naiwieng 21
Ka Archery Association of Meghalaya (AAM), ka la sei madan ïa ka kynhun ïalehkai shynrang bad kynthei, kaban leit ban mihkhmat ïa ka Jylla sha ka jingïakob siat khnam ba la tip ïa ka kum ka 42nd NTPC Sub- Junior (Recurve, Compound & Indian Round) Archery Championship.
Ïa kane ka jingïakob, yn pynlong ïa ka ha nongbah Itanagar, Arunachal Pradesh mynta u bnai Naiwieng.
Katkum ka kyrwoh na ka synjuk ha ka kyrdan ïakhun jong ka Recurve kaban long ha ka 23 bad 24 tarik mynta u bnai, na ka liang ki shynrang kiban mihkhmat sha kane ka jingïakob ki long u Devraj Mohapatra (E.K.H.D), Aryan Thapa (E.K.H.D), Banpunskhem Lyngkhoi (S.W.K.H.D), Donaljune Pariong (S.W.K.H.D).
Na ka liang ki kynthei, kiban mihkhmat sha kane ka jingïakob ki long ka Aifida Kharsohphoh (W.K.H.D) Coach-Gunin Chiangmai, Coach-A.S. Mercy (Head coach Khilo India)
Katba ki khynnah shynrang kiba la shah jied ban mihkhmat ha ka kyrdan ïakhun jong ka Compound kaban long ha ka 26 bad 27 tarik jong une u bnai ki long u Thangboy Ch Marak (E.G.H.D) bad na ka liang ki khynnah kynthei dei ka Sneha Thapa(E.K.H.D), Coach-A.S. Mercy ( Head coach Khelo India).
Haba ïadei pat bad ka jingïakhun jong ka Indian Round kaban long ha ka 29 bad 30 tarik mynta u bnai na ka liang ki shynrang ki long u Rickychan Iawphniaw (S.W.K.H), Bravestarwell Nongbri (W.K.H.D), Remedy Nongpluh (E.J.H.D), Rakkamrik M. Marak (E.G.H.D).
Katba ki khynnah kynthei pat, ki long ka Illarisuk Wanniang (S.W.K.H.D). Merisha Marthong (W.K.H.D), Maphibapynkmen Marngar (S.W.K.H.D), Emisha Kharsohphoh (W..K.H.D), Coach-A.S. Mercy (Head Coach Khilo India) center coach Shillong.
Kumta, ka synjuk ka shim ruh ïa ka kabu ban kitbok kitrwiang ïa kane ka kynhun baroh kawei ba kan poi suk poi saiñ bad ruh ban lah ban ïalehkai bha khnang ban lah ban wanrah ïa ka nam bad burom ïa ka Jylla hi baroh kawei.
