Shillong, Naiwieng 24
Ka Confederation of Meghalaya Social Organisation (CoMSO) ka la dawa ïa ka Sorkar Jylla ba kan shim rai mardor ha ka ban tehlakam ïa ka jingwan rung ki briew ba na West Bengal bad Assam, kiba shah ktah na ka jingpyntreikam ka Election Commission ïa ka Special Intensive Revision (SIR) ha kine ki Jylla.
U Bah Roykupar Synrem Chairman ka CoMSO ula ong, ka Sorkar Jylla Meghalaya ka dei ban pynthikna ba ki briew kiba wan rung hapoh ka Jylla kim dei ban long ki briew kiba la shah beh ha ka Sorkar Assam ne West Bengal.
U la ong ba ka Sorkar Jylla ka dei ban ai hukum ïa ki Deputy Commissioner, Superintendent of Police bad ki bor ba dei peit sha ki thaiñ khappud ba marjan bad kine ki Jylla, ba ki dei ban pynthikna ïa ka jingrung jingmih ki briew kiba shah beh na ka jingtreikam ka SIR ba kim dei ban ïoh rung hapoh ka Jylla Megha-laya, namar ka jingwan rung jong ki, ka lah ban ktah ïa ka shongsuk shongsaiñ bad ka ktah ruh ïa ki jaitbynriew rit paid.
U Bah Roykupar u la ban jur ïa ka Sorkar Jylla, kaba la iohbor da ka aiñ, ba ka don ka kamram katkum ki kyndon aiñ bapher-bapher ban pyrkhing ïa ka jingrung ki briew, ban talasi ïa ki kot ki sla, ban pynshisha bad pyntreikam ïa ki lad ki lynti kiba donkam na ka bynta ban khanglad ïa ka jingrung jingmih ki briew.
Haba bynrap u la ong. “Kane ka dei ka kam ba ïadei bad ka jingshngaiñ u paidbah bad ka jingkitkhlieh katkum ki lynti ka aiñ. Ki paidbah ka Jylla ki khmih lynti ban ïohi ïa ki sienjam kiba sted, kiba skhem bad kiba shongaiñ.”
