Jowai, Naiwieng 24
Ka Nongkhroh Mawsiang ka la long ka lahduh ha ka lympung ïalehkai kaba la ai nam ha ka kyrteng ka kmie jong u Myntri ka tnad Sports & Youth Affairs ka Sorkar Jylla bad MLA ka Jowai Ma Wailadmiki Shylla kaba tip kum ka Hajan Shylla Memorial Trophy-1st Division Football Tournament ba la pynïaid da ka Thadlaskein Sports Association (TSA).
Kane ka la wan hadien ba ka Nongkhroh Mawsiang kala pynrem ïa ka Lurshai Larnai da 3-1 kol ha ka jingïalehkai phainal kaba la long ha madan Multi Sports Complex, Wahiajer ha ka 24 tarik Naiwieng.
Ka jingïalehkai phainal hapdeng kine ki ar liang kynhun, kala long kaba ïakhaid bha ha kaba ha ka por kaba la buh ka jingïakhun ka la kut da ka jingïakhaid kaba mar 1-1 kol.
Ban rai mano ban ïoh rah ïa ka nam lahduh, la rah ïa ka jingïakhun sha ka Extra Time kaba mar 7 minit shiliang bad da ka jinglah jong ki rangïalehkai ban ïalehkai bha, ka Nongkhroh Mawsiang kala lah ban pyntam da artylli ki kol bad rah syndon ïa ka nam lahduh.
Ïa ki kol jong ka Nongkhroh Mawsiang la thep da u Pyndapbiang Marboh tang ha ka minit kaba 6, Rio Marboh ha ka minit 83 bad Sonowel Kharsati ha ka minit 87. Katba ka shikol jong ka Lurshai Larnai la thep da u Iaidonryngkat Shadap haka minit 41.
ïa ki khusnam sha ka kynhun lahduh la sam da u Myntri ka tnad Sports Ma Wailadmiki Shylla da ka song pisa kaba T. 50 hajar katba ïa ka kynhun kaba wan ba ar la sam da ka Kong Rimiful Shylla kaba dei ruh ka kurim u Symbud Myntri Rangbah ka Jylla Ma Sniawbhalang Dhar da ka song pisa kaba T. 30 hajar.
La sam ruh ïa ki khusnam shimet ha kaba ïa ka nam ‘Best Player’ la ïohrah da u Sonawel Kharsati, ka nam Top Scorer da u Rio Marboh uba la thep 11 kol ha kane ka aiom ïalehkai, bad ka nam Best Goalkeeper la rah da u Sanborlang Kharsahnoh baroh lai ngut kidei na ka kynhun Nongkhroh Mawsiang.
Ha kane ka sngi la donlang ruh u MDC ka thaiñ Ma Reformingson Lamare, u District Sports Officer (DSO), West Jaintia Hills Ma Khroobok Passah, u Dolloi ka Elaka Jowai Ma Puramon Kynjing, ki nongïalam bad dkhot nongkitkam ka TSA naduh u President Ma Kmenlang Shylla, Vice President Ma Eberist Pariat, kumjuh ki nongïalam bad dkhot nongkitkam ka West Jaintia District Sports Association (WJDSA) nalor ki paidbah nongkyrshan na baroh arliang kynhun.
