Shillong, Naiwieng 24
Ki pulit ka ANTF ha ka janmiet sngi U Blei, kila ïoh kem ïa uwei u suba nongkhaïi drok, uba thmu ban pynpoi ïa u drok sha uwei u nongdih ha Umpling, Lumdieng-met.
Une u suba nong-khaïi drok u kyrteng u Pynshngain Kharkongor ba na Lumdiengmet, Umpling.
Ïa u Pynshngain la ïoh bat ha Lumdiengmet katba u dang don ha ka kali jong u ka Swift Dzire ML05-R-9778. Ha ka jingtalasi ïa ka kali ha ryngkat ka jingdon lang ki nongsakhi laitluid, ki pulit kila ïoh kurup ïa ar tylli ki synduk sabon kiba thep ïa u heroin uba khia haduh 22.83 gram.
Ïa une u briew la pynrung mukotduma ha thanad Rynjah hapoh ki kyndon ka NDPS Act. Ka jingtohkit mynta ka la ïaid shakhmat.
