Jowai, Naiwieng 24
U Myntri ka tnad Sports & Youth Affairs ka Sorkar Jylla bad MLA ka Jowai Ma Wailadmiki Shylla ula pynbna ba ka Sorkar kala pynkhreh ïa ka Detailed Project Report (DPR) ban shna ïa ka Youth Hostel bad Indoor Hall hapoh ka Multi Sports Complex kaba ha Wahiajer, West Jaintia Hills District.
Ïa kane u Ma Wailadmiki Shylla ula pynbna haba kren kum u kongsan ha ka Final jong ka lympung ïalehkai 1st Division Football Tournament-Hajan Shylla Memorial Trophy ba la pynïaid da ka Thadlaskein Sports Association (TSA) ha madan Multi Sports Complex, Wahiajer ha ka 24 tarik Naiwieng.
‘Hapoh ka jingïalam jong u MLA ka thaiñ Ma Sniawbhalang Dhar, ngi la pynkhreh ïaka DPR na ka bynta ban shna ïa ka Youth Hostel bad Indoor Hall hapoh kane ka Complex khnang ban ailad ïa ki samla ban ïashim bynta ym tang ha ka jingïalehkai phutbol hynrei ha kiwei de ki jait jingïalehkai’, la pyntip u Ma Wailadmiki Shylla.
Ka jingdon jong kane ka madan ka long shisha ka jingkyrkhu ïa ki samla don sap jong ka thaiñ, hynrei ngim kwah ba kane ka madan kan kut tang kumne, la ong u Ma Wailadmiki Shylla bad u pyntip ruh ba la dep ban khot tender T.8 klur na ka bynta ban pynieng ïa ki Floodlight khnang ba yn lah ban pynlong ïa ki jingïalehkai wat ha ka por mynmiet’.
Shuh-shuh u Ma Wailadmiki Shylla ula ong, ka Sorkar ka khlem pynleit jingmut tang ha ka ban pynbha pynmiat ïa ki madan madiah hynrei ka angnud ruh ban pynshlur ïa ki nongïalehkai sports da kaba wanrah ïa ka Meghalaya Outstanding Sportspersons Direct Appointment Policy 2025 khnang ba ki nongïalehkai sports kiba ïoh khur takma haka lympung ïalehkai Olympics/Paralympics/Special Olympics, Asian games lane Asian para games, Common Wealth, lane Common Wealth Para Games, South Asian Games bad National Games kin ïoh lad ban rung kam ha ki tnat treikam bapher bapher ka Sorkar Jylla.
Kane kadei ka lad ka kabu ïa ki nongïalehkai, la ong u Ma Wailadmiki Shylla bad ha kajuh ka por ula pynshlur ruh ïa ki ba kin trei shitom bad duriap bha ha ka jingïalehkai, khnang ba shisien ka sngi kin wanrah ïa ka nam ka burom ïa ka ïing ka sem, ka District bad Jylla bad ba kin ïoh jingmyntoi ruh ha ka jingim jong ki.
