Shillong, Naiwieng 24
U khlieh nongïalam ka United Democratic Party (UDP) uba dei ruh u Myntri Sorkar, Bah Metbah Lyngdoh u la ong ba u pdiang ïa kano-kano ka jait jingtohkit lada don kano-kano ka jingpyndonkam bakla ha ka ban pyntreikam ïa ka skhim MLA.
“Ngi pdiang sngewbha ïa kano-kano ka jingtohkit lada ki briew ki ïohi ïa ki jingduna ne ka jingpyndonkam bakla,” ong u Bah Metbah sha ki nongthoh khubor ha ka Lah Sngi U Blei.
Haba kyntait ban kren eiei halor ka jingsngew jong kiwei pat ki seng saiñpyrthei, u la ong, “Hynrei ha nga hi shimet, kum u MLA jong ka Mairang, ngi ïaleh ban pyntreikam na bynta shispah na ka shispah ha ka rukom kaba shai-ban pyntikna ba ka pisa kan poi sha ki nongïoh jingmyntoi kiba dei hok.”
“Kum ki shakri paidbah, ngim long kiba biang lut ne khlem jingduna; ki jingbym biang ki don. Hynrei ka jingthmu kam dei ban long satia ka jingbamsap ne ka jingpynduh ïa ki hok,” u la pynpaw.
“Ym don MLA uba lah ban kam ba u biang lut baroh-ngi shaniah ha ki jingai jingmut jong ki Dorbar, ki samla, ki seng kynthei (na ka bynta ban pyntreikam ïa ka skhim). Hynrei kum ki nongïalam, (ngi kwah ban pyntikna ïa ka jinglong kaba shai) ha ka jingpyntreikam ïa ki skhim,” la bynrap shuh-shuh u Bah Metbah.
