Agartala, Naiwieng:
Kum shi bynta ban khanglad ïa ka jingwan rung tuh jong ki briew ba nabar, u Myntri Rangbah ka jylla Tripura u Manik Saha u la bthah ïa ka Police & General Administration ba ka la dei ban pyntreikam kham stet ha ka ban ithuh bad ïoh ban pynmih ïa kum kine ki jait briew.
U Saha, u la bthah ïa baroh ki District Magistrate (DM) bad ki Superintendent of Police (SP) jong ki District ba kin long kiba husiar bad pynlong ïa ki jingïaid lynti kiba jur ban lap ïa ki nong Pakistan lada ki wan poi ha Tripura na kano kano ka daw.
Ka jingthmu jong ka sorkar jylla ka long ruh halor ka jingïada ban lait na kino kino ki kam pyntriem jong ki runar, ki riewshim kabu bad ki lehnoh. Naba kumba la shem ba kiba bun ki runar kiba ju shahkem halor kiba bun ki kam runar ki ju dei kiba nabar bad kiba la shu poi shong poi sah sha ki bynta jong ka jylla na ka jingwan rungtuh jong ki na ki bynta khappud.
Shwa ïa kane, u Saha u la pynïaid ïa ka jingïalang jong ki DM bad ki SP jong baroh ki distrik ha Agartala. Ka jingïalang bahakhliehduh la khot ban pynkut ïa ka Roadmap ban pyntreikam ïa ki jingbthah kiba wan na ka sorkar pdeng.
Da kaba pynthikna ïa ka jingïatreilang kaba kham bha & ka jingsynshar kaba treikam, mynta ka sngi u la pynïaid ïa ka jingïalang lyngba ka jingïakren ha ka durkhih bad baroh ki nongbishar bad ki heh pulit jong ki District halor ka rukom peit bniah ïa ki kam.
Ka sorkar ka don jingkyrmen ba yn sa lah ban weng ïa ki jingeh baroh ha kaba ïadei bad ka jingwan rungtuh ki briew ba nabar ha ryngkat ka jingpyrkhing.
