Shah pynshitom ki jaka die dawai beaiñ ha Kerala

Thiruvananthapuram:

Ki heh jong ka State Drugs Control ki la shim ïa ki sienjam katkum ka aiñ pyrshah ïa kawei ka dukan die dawai, ka JJ Medicals kaba don ha Poosharippadi, North Paravur namar ba ka la pynleit jingmut ha ka jingkhaïi beaiñ ïa ki dawai online .

Ki bor pynjari aiñ jong ka tnad District Drugs Control ha ka por ba ki jurip ki la lap ba ïa kitei ki dawai, u Manforce 50, Manforce 100 bad Vigore 100 la thied khlem ka jingthoh na u doktor ba la Register lane da ka Bill thied bad ba la die lyngba ka online.

Kane ka dei ka sien kaba nyngkong ba la shim da ka aiñ katkum ka aiñ Drugs and Cosmetics Act 1940, halor ka jingdie be-aiñ ïa ki drok online ha ka Jylla.

Ïa ki dawai kiba la ïoh kurup bad baroh ki kot ki sla kiba ïadei bad ka jingthied/die jong ka la pyni hakhmat ka iingbishar jong ka North Paravur Judicial First Class Magistrate’s.

Ka myntri ka tnat ka koit ka khiah ka koit ka khiah ka Veena George ka la thoh kham mynshwa sha ka tnad ka koit ka khiah jong ka sorkar pdeng ba dei ban shim ïa ki lad ki lynti ban khanglad ïa ka jingthied dawai online beaiñ na kiwei pat ki Jylla bad la bthah ïa ka tnad State Drugs Control ba kan shim ïa ki lad ki lynti kiba tyngeh pyrshah ïa kum kine ki jaka pynmih dawai.

Kum kane ka jingdie drok online kam shym la long kaba ju jia ha Kerala. Hynrei mar ïa ïoh jingtip ba kawei ka kompeni ka die dawai lyngba ka online, uwei na ki heh jong ka Drugs Control u la leit sha ka website jong katei ka kompeni bad pyrshang ban order dawai lyngba ka online.

U la lah ban thied ïa ki dawai online khlem da don jingthoh na u doktor. Ka address jong ka kompeni ba la ai ka dei kaba thok, kaba la pynlong ïa ka jingwad ïa ka kompeni kaba eh.

Kum shi bynta ban ïakhun pyrshah ïa u drok ha ka jylla bad ha ki jaka khappud, ki pulit jong ka Kerala ki la mih shakhmat ban pynlong ïa ka jingleit khynra ha kylleng ki jaka.

Kane ka jingpyntreikam kaba bteng na ka por sha ka por, ka la long ha ryngkat ka jingïatreilang bad ki pulit na ki jylla bamarjan bad kumjuh ha ki bynta khappud. 

Ka jingïatreilang ka long da kaba ïasam jingtip halor u drok bad ki nongwan rungtuh, da ka jingthmu ban rat dyngkhong ïa ki nongdih drok bad ki nongleh kam sniew kiba don ka jingïadei hapdeng ki jylla.

Ha ka jingïalang ba la dep ban pynlong hashwa, la rai ban pynpoi ïa ki jingtip bad ban pynïadei ïa ki kam ha ki jingjia ba ïadei bad u drok kiba don ki jingktah hapdeng ki jylla.

Kane ka sienjam la khmih lynti ba kan ïarap ïa ki pulit ban tehlakam ïa ka jingpoi u drok sha Kerala namar mynta ka lah ban shimkhia ïa ki pulit na kiwei pat ki jylla ban tehlakam ïa ki nongkhaïi drok kiba don ha ki jaka ba ki don.

Ki pulit jong ka jylla ki la rung ruh ha kajuh ka jingïasngewthuh jingmut bad ki pulit Goa halor ka jingïasam jingtip halor ki kam khaïi drok bad ban shim ïa ki lad ki lynti kiba ïatreilang pyrshah ïa ki. Ki pulit ki la suba slem bha ba la wanrah ïa u drok thok sha kane ka jylla na Karnataka bad na Goa.

“Ka jingseisoh jong kane ka rukom treikam ka long ba haba ngi kem ïa u briew uba don ïa u drok bad u pynpoi ïa u sha ki briew ne ki kynhun runar kiba don shabar jong ka Bengaluru, ngi lah ban pyntip sha ki pulit jong ka Karnataka halor kane. Ki lah ban leh mardor ïa ki jingtip kiba ngi ai bad kan don ka jingbuddien na ka liang jong ki. Kane ka dei ka jingjop na ka bynta baroh ki bor pulit kiba donkti ha katei ka kam”, la ong uwei u heh pulit.

Ka Kerala ka la mad ïa ka jingkiew kaba khlem pat ju jia mynno mynno ruh ha ka jingpyndonkam ïa ki drok thok bad kiba bun ki jingjia shah pynïap briew kiba shyrkhei kiba la jia ha kine ki por ba la dep ha kaba la lap dien ba ki dei na ka daw jong ki jingdih drok.

Katkum ka jingïathuh jong uwei u heh ophisar, la thaw ïa ka WhatsApp group kaba don ki Nodal Officer jong kawei pa kawei ka Police Unit kum ki dkhot ban ïasam jingtip.

Wat lada ka sorkar pdeng ka la sdang dang shen ïa kane, ka la nang treikam bad ka jingmih haduh mynta ka long kaba ai mynsiem, la bynrap biang une u ophisar.

Nalor ki kam ba ïadei bad u drok, ki bor pulit kiba donkti ha katei ka jingpyntreikam kin sa ïasam ruh ïa ki jingtip ba bniah shaphang ki nongleh kam sniew kiba phet krad.

Yn sa ïasam ïa ki jingtip ba bniah jong kum kine ki briew, kiba la donkti ha ki kam runar kiba shyrkhei kum ka jingpynïap briew, ka jingshah lehbeiñ bad ka kam runar.

Kane ka jingtrei shitom jong ki pulit ka jylla bad kumjuh ki kynhun ba la ïatreilang kan sa lah ban rat dyngkhong ïa kine ki jingeh baroh.