Nigeria, Naiwieng:
Ym duna ia ka 50 ngut na ki 300 ngut tam ki khynnah kiba la shah rahbor ha ki ‘riew kieng-atiar na kawei ka skul Katholik ha Nigeria, ki la lait im na ka kti jong kitei ki nongrahbor, la iathuh kawei ka kynhun Khristan ha ka Sngi U Blei, ha ka por ba u President u dang pynbna ia ka jingpyllait im ia ki 38 ngut ki riew ngeit kiba la shah kem ha ka jingleit thombor kitei ki kynhun kieng atiar ha ka taiew ba ladep.
Namar la ong ba kitei ki riew kieng atiar, ha ka Sngi Thohdieng ki la hiar thma ïa ka skul pule jong ka St.Mary’s Co-education ha ka jylla Niger, ha kaba ki la kit bad rahbor ïa 303 ngut ki khynnah bad 12 ngut ki nonghikai ha kawei na ki kam rahbor paidbah kaba heh tam ha Nigeria.
Kane ka la jia hadien katto katne sngi ba ki ‘riew kieng-atiar jong katei hi ka ri, lo la leit hiar thma ia kawei ka skul heh ha ka jylla Kebbi kaba marjan, ha kaba, ki la rahbor ia 25 ngut ki khynnah kynthei ha katei ka por.
Ha ka Sngi Ba-ar pat la ong ba kitei ki riew kieng-atiar ki la leit ban khynra ia kawei ka ïingmane hapoh ka Jylla Kwara ha ka jingthombor kaba la ring bad pyni lyngba ka online bad ba la iohi ia ka jingiaseng kaba la shah pynthut da ka jingsawa jong ki ktang suloi, ha kaba la iohi ia ki paidbah riewngeit kiba don ha katei ka ïingmane, ba ki la ia phet krad bad la iohsngew ia ka jing lynñiar wat shaduh shabar jong katei ka ïingmane.
Ka jingdon jong ki khynnah shynrang bad kynthei kiba don hapdeng ka rta kaba 8 bad 18 snem, kiba la shah rahbor na St Mary’s ka long la mar shiteng ia ka jingdon jong ki khynnah skul jong katei ka skul kaba don ia palat 600 ngut ki khynnah pule.
Ka sorkar Nigeria kam shym la kren eiei halor ka jingdon ki khynnah kiba la shah arhbor na katei ka skul, hynrei u President Bola Tinubu u la pynbna hapoh ka rynsan ‘X’ ba 51 ngut na ki khynnah kiba jah jong katei ka skul Katholik, la lap bad la ioh ban pyllait im biang noh ia ki.
Ha kajuh ka jingpynbna, u Tinubu u la ong, “Da ka jingpyrshang jong ki bor pahara jong ngi ha kine ki khyndiat sngi ba la dep, la ioh ban pyllait im biang noh ia baroh 38 ngut ki riewngeit kiba la shah rahbor na Eruku jong ka Jylla Kwara.”
Shuh shuh ruh u la ong ba un ym sngap jar ne ailad ia kum kine ki jingjia ba kin wan jia hapoh u pud- u sam jong ka ri namar man uwei pa uwei u nong Nigeria, ha man la ka jylla, u don ka hok ban ioh ia ka jingshngaiñ bad hapoh ka jingpeit jong u, kin pynskhem ia katei ka jaitbynriew bad kin pyntikna ia ka jingiada naka bynta ki briew jongki.
Ka jingsyier kaba la nang mih ha kine ki sngi ha katei ka ri kaba bun briew tam ha Africa, ka la wanrah ia ka jingkhangdam ia ki skul bad jaka pule ha ki katto katne ki bynta jong katei ka ri.
Naduh ba ki lehnoh Islamist ki la rahbor ïa jan 300 ngut ki khynnah skul na ka nongbah Chibok palat shisnem mynshwa, ka Nigeria ka la ïakhun pyrshah ïa ki jingjia rahbor paidbah kaba kham bunsien la leh da ki kynhun ehrang kiba kwah tang ban ioh dawa pisa.
Namar la ong ba ki ‘riew kieng-atiar ki ju thombor ia ki skul kiba jngai ha kaba ki tip ba ka jingbym don ki nongpahara kan pynlong ia ki nongshah thombor ba kin ngat da kaba suk, ha kaba, bun sien hi la ju pyllait noh pat ia ki nongshah rahbor ynda la dep ban iakren.
