Shillong, Naiwieng 24
Ka Langsning FC kaba bat ruh ïa ka nam kum ka lahduh ha ka Shillong Premier League, ka la jop da ka said kata tang da 2-0 kol pyrshah ïa ka Umlyngka SC, katba ka jingïakhun hapdeng ka Mawkasiang bad ka Mylliem Lum ka la kut noh ha ka jingïakhaid kaba long da mar shi kol, kine ki long ki artylli ki khubor, na ka sngi kaba sdang jong kawei pat ka lympung ïalehkai ba thymmai ka Shillong Sports Association ka Champions Cup 2025, kiba la long mynta ka sngi ha SSA Stadium, First Ground, Polo.
Ïa ki artylli ki kol ba kordor tam eh naka bynta ka kynhun ïalehkai ka Langsning FC la thep ïa ki da u Wanshwadame Diengdoh (78′) bad u Donlad Diengdoh (84′).
Katba u Edmon Marngar (23′) bad u Eliastar Nongsiej (30′), ki long ki arngut ki rangïalehkai kiba la ïoh ban thep ïa ki kol na bynta ka kynhun ïalehkai jong ka Mawkasiang bad Mylliem Lum.
Haba phai sha ka jingïakhun ka Langsning FC, lehse ka khmih lynti ba ka nam jop ba kan khur na kane ka jingïakhun pyrshah ïa ka Umlyngka kan long da ka lynti kaba suk, hynrei kane ka kynhun kaba wan ba-ar na ka lympung ïalehkai ka Third Division, kam shym la shu shah jem satia ïalade, hynrei ka ïai pynpaw ïa la ka jong ka jingtbit bad khlaiñ katkum i buit i bor ba ka lah ei.
Ïa ka sur ïakhun kaba tyngeh bad kaba dohïap bha na ka Umlyngka, ka la mihpaw ha ka kylla miet, kaba hangne kum ka kynhun, ka Umlyngka ka la pyrshang lem ba kan nion lem shakhmat, hynrei sniewbok ba i jingduna ha ka kynhun ka pynlong pat ïa ka ba kam lah ba kan pynwandur ïa kane ka sur ïalehkai ka jong ka sha ka thong ban ïoh ban pynkhih ïa ka jar, hynrei kaba la lah pat ban ïarap bad ïada pat ïa ka ban shah pynkhih ïa ka jar hakhmat ka Langsning, dei u ‘rangap kol u jong ka, u Babitlang Wahlang, kaba bunsien u la lah shisha ban ïeng ban ïada bha ïa la ka jong ka kol, kaba hangne ka la pynlong ïa ka kynhun ïalehkai ka Langsning ban kham trei shitom ban ïoh ba kan thep ïa kine ki ar kol ki jong ka.
Shwa ïa kane ka jingïakhun, ka Mawkasiang kaba long ka lahduh jong ka Fourth Division, ka la rung shapdeng ka madan da ka jingkut jingmut kaba skhem bha, katno tam lei-lei ba kan pyndonkam hok ïa ka kabu ksiar ban ïoh ban shim kylliang ïa kumba 5 ngut ki rang ïalehkai na ka kynhun ïalehkai ka Mawlai, bad kane ka jingshim kylliang ka la treikam hadien ba u Fairming Suting, u la noh synniang sha ka kynhun da ka bol kaba u la pashat sha u Edmon ban ïoh ban pynkhih ïa ka jar.
Pynban na ka liang ka Mylliem Lum, kaba dei ka lahduh ka Second Division, ka ruh ka la pynkhlain ïa la ka kynhun bad na ka por sha ka por ka la nion borbah bha ïa ka jingïalehkai ka Mawkasiang.
Kumta ha kaba kut jong kine ki artylli ki jingïakhun ba sdang ka Champions Cup, ka pawshai kdar ba ki kynhun ne ki team na ki kyrdan kaba kham rit, kim dei satia kiba tlot, pynban haba ïoh lei lei ïa kat kane ka kabu ksiar, kum ka kynhun kim don eiei ban aidaw, hynrei ban mih madan bad ban ïakhun tyngeh bad dohïap beit ban beh sha ka thong ban kynjoh shakhmat.
Ha ka 25 Naiwieng, ka jingïakhun kan dei naka bynta ka Group B bad ha ka por 1 baje nohphai sngi ka lahduh ka First Division kata ka Nongkseh SS&CC kan mih madan ban aireng pyrshah ïa ka kynhun ba wan ba-ar ka Second Division ka Laitkyrhong SC.
Hadien kane, ka jingïakhun kan long pat hapdeng ka Shillong Lajong FC pyrshah ïa ka kynhun ba rah ïa ka nam lahduh ka Third Division ka Mawkriah West kaban long ha ka por 4:30 janmiet.
