Shillong, Naiwieng 24
Ka United Democratic Party (UDP) ka dang khmih bniah ïa ka buit treikam jong ka na ka bynta ka ilekshon ban wan sha ka Garo Hills Autonomous District Council (GHADC), ha kaba u khlieh nongïalam ka seng, Bah Metbah Lyngdoh u la pynbna ïa ka komiti ba kyrpang ban bishar bniah ïa ka jinglong-jingman la ka biang ne em ban ïaid shakhmat bad ka jingïakhun.
“Ngi la thaw ïa ka komiti ba la ïalam da ki nongïalam na Ri-lum Garo ban bishar bniah ïa ka jinglong-jingman la ka long ne em kaba biang ïa ka seng ban ïakhun ha ka ilekshon ban wan,” ong u Bah Metbah haba kren sha ki nongthoh khubor ha ka Lah Sngi U Blei. Haba kylli, u Bah Metbah u la kyntait ïa ka jingïateh lok hashuwa jong ka ilekshon bad ki paralok kiba don lang hapoh ka MDA.
“Lada ngi hap ban mih sha ka madan ïakhun, ngi kham sngewlah ban ïaid marwei,” u la ong.
Katkum ka jingong jong u, ka seng kan ap shuwa ïa ka kaiphod na ka komiti ba kyrpang hashuwa ban shim ïa ka rai halor kane ka bynta.
