D H Kharkongor
Kane ka dei ka taïew kaba khadduh, ka jong une u bnai uba Khatwei. Shen wat une u 2025 ruh un sa leitnoh shadien.Katta kaba nangïaid ki minit, ki kynta bad ki sngi ba katta ngi barohlang ngi nangjan sha ka sngi kaba ngin hap ban ïehnoh junom ïa kane ka pyrthei. Ngin ïehnoh pat de ruh ïa baroh kiei kiei naba kumba ngi wan lyngkhuid sha kane ka sla pyrthei ba kumta ruh ngin leit lyngkhuid nangne na sla pyrthei. Ngan pynkymaw biang ïa kane kawei ka jingshisha bad kata ka long ba ym don mano mano ruh ba lah ban tip lypa ïa la ka jong ka sngi kaba khadduh. Kawei pat ka jingshisha ka long ba u briew un khlad noh ynda ka la dei ka sngi ïa u ba un khlad. Ym ha shwa ne hadien. Hynrei wat ma u hi ruh um lah ban tip lypa lymne ïathuhlypa ha kano ka khyllipmat ne ha kano ka sngi un khlad noh na kane ka pyrthei. Um lah ban batai lypa da kano ka rukom un khlad noh bad ruh hangno un khlad noh. Kumta kam don jingmut ba ngin ïa pynshitom beiñ than eh ïalade dalade wei ba ngin nym imsah hangne ha sla pyrthei.
Pynban ngi kum kletnoh ba ngin nym imsah hangne ha sla pyrthei. Ngi kum im pynban la kum ki ban imsah hangne ha sla pyrthei.Ngi da kum kletnoh ruh de ba kuba ngi wan thylli ngin leit phai ruh thylli. Kumta ngi kum kletnoh ba la ngi nang ngi stad katno katno lane la ngi khraw bor katno katno lane la ngi pahuh pahai katno kattno pynban kita kiei kiei kin sa long leh nohei noh wei ba ngin sa donkam pynban ïa ka jingïarap lem ka jong kiwei ynda haba ngi la khlad noh nangne na sla pyrthei. Kumta wat tang ba ngin hiar hi dalade sha la ka thliewtep lane kiew hi dalade sha la ka kpep thang ruh ngin nym lah. Te ïaei ba ngin sarong biej wei ba ngin sa donkam ïa ka jingïarap lem ka jong kiwei wat ban tep lane ban thang ïa ka met kaba sah ka jong ngi. Ka jingshisha ka long ba wei ba ngi la khlad ngi la khlad bad ngin nym lah lymne donbor eiei shuh, kata, ba ngin kyrkhu lane ba ngin tim ne tla, nangta na lyndet, ïa kiba dang sah hangne ha slapyrthei.
Kam don jingmut ban rhah lane ban khwan la ïa kaei kaei ruh. Kam don jingmut ban sarong biej la ïa kaei kaei ruh. Kam don jingmut naba katno ngut eh ki ban sa kynmaw ieit lane pyrto lane sahnud ïa ngi ynda haba ngi la khlad noh na kane ka pyrthei. Lehse tang ita I tnga bad kita ki khun, katta ruh lada ngi don ïa ki.Tangba wat kata ka jingkynmaw ieit ka jong ki pat de ruh kan sa long tang katto katne snem. Hadien katta ïar ba wat ma ki ruh kin dang kynmaw ieit ïangi. Kumta la ïa kaei kaei ruh ynnai pynlyngkhum jingmut jingpyrkhat than eh dalade ïalade bad ynnai pynkhuslai mynsiem than eh ruh de dalade ïalade. Ka hynnin ka la leitnoh bad kan nym wan phaishuh. Ka lashai pat de ruh kan dang ïa idei hi kaei kaei kaba ngim lah ban tip lypa lymne batai lypa.
Ym don ba tip thikna kaba kumno kata ka lashai. Ka jingsngewthikna ïa la ka lashai ka dei ka jingshukor kaba dalade ïalade. Kaba katno tam ban batai lypa ïa ka lashai ka jong kiwei. Kumta kumba ym dei ban ïaibynniaw ïa ka hynnin ba ym dei hi ruh ban khuslai jingmut than eh ïa ka lashai.Ynnai pynsep ei ïa kane ka mynta da ka jingbynniaw lane jingbabe ïa la ka hynnin kaba ha ryngkat ka jingkhuslai jingmut jingpyrkhat than eh ïa ka lashai. Kumta im pura pynban ïa kane ka mynta. Ai nguh bad sngewnguh pynban, ïa U Blei, namar kane ka mynta. Namar kata im (live) pynban ïa kane ka mynta la kumba ka dei ka sngi kaba khadduh nangne ha sla pyrthei. Im ïa ka jingim kaba don jingmut, kaba katkum ka jingthmu ka jong U Blei, uba U Trai bad U Kynrad halor kiei kiei baroh. ñiuma, kiba dang lung than eh naduh ka rta tad haduh ka bor pyrkhat pyrdain kin nym sngewthuh lymne shemphang ïa kane kaei kaei.
Ka jingim kaba khuslai jingmut than eh kumno kiwei ki pyrkhat lane kumno ki sngewthuh shaphang jong ngi ka dei ka jingban beiñ kaba dalade ïalade. Kam don kam ba baroh baroh kin sngewthuh bad kin pdiang ïangi. Ym donkam hi ruh ban pynshai lada ki sngewthuh bakla shaphang jong ngi. Ym donkam ban khuslai jingmut ïa kata kaei kaei naba ym lah ban pynsngewbha ïa baroh lynter tait. Ym tang kumta hynrei ym donkam hi ruh ban tip than eh shaphang ka jingim ka jong kiwei. Angnud pynban ïa ka jingim kaba jar jar da kaba ynnai tuklar than eh ïa ka jingim ka jong kiwei. Ieh kin im kat kum la ka jong ka bor sngewthuh. La ïa kaei kaei pat ruh ynnai khmih lynti (expect) than eh ruh de na kiwei. Ynnai naba ki ruh ki dei hi tang ki briew. Ynnai naba bunsien bunsien ka jingkhmih lynti than eh ka jong ngi na kiwei ka khate noh pynban naduh ïa ka jingsuk (peace) tad haduh ïa ka jingkmen (joy). Te kumta ynnai pynshitom beiñ pynban dalade ïalade.
