Shillong, Naiwieng 25
U Myntri Sorkar bad nongïalam ka UDP, Bah Lahkmen Rymbui u la ban jur halor ka jingdonkam jong ka Sorkar Jylla ban pynkiew ïa ka jingmang pisa na ka bynta ban pyntreikam ïa ka skhim MLA da kaba kdew ba ka jingmang pisa kaba mynta ka dang duna na bynta ban khmih bniah ïa ki jingdonkam bapher-bapher jong ki paidbah.
“Ha ka jingshisha, ïa ka skhim MLA dei ban pynkiew (bad) ym (ban sah) tang T. 2.5 klur. Kane ka long namarba ngi (ki MLA) ngi hap ban pynbiang ïa kiba bun ki jingdonkam na ka bynta ki paidbah,” ong u Bah Rymbui haba kren sha ki nongthoh khubor ha ka Sngi Ba-ar.
Ha kajuh ka por, u la ïada haba ïadei bad ka jingpyntreikam ïa ka skhim MLA, da kaba kyntait ïa ka jingkyrpad na bynta ka jingtohkit ba laitluid, bad ong, “Kam dei ka pisa shimet jong uno-uno u MLA, ka dei na ka bynta ka jingbha jong ki paidbah. Kumta, baroh ki MLA ki ïasam, ki pyntreikam ïa ki skhim ha la ki jong ki jong ki konstitwensi.”
Hynrei u la kdew ïa ki jingpynslem namar ka jingpynkynriah kam ïa ki ‘engineer’ bad ka jingbuh jingkheiñ kaba dier por.
“Kum ma nga, ki don katto-katne ki skhim, kiba naduh u snem 2023-2024, bun ki la dep, bad don kito kiba dang don hapdeng ka jingpyntreikam. Teng-teng, namar ka jingpynpoi slem ïa ki jingbuh jingkheiñ, teng-teng ki don ki por ha kaba ki jingkheiñ kiba hap ban mynjur da u ‘Executive Engineer’ (EE) jong ka DRDA, namar ka jingpynkynriah kam ba khah-khah ïa ki enjiniar ha kiba bun ki distrik, ki don bun ki EE kiba wan ha ki por bapher-bapher,” la ong u Bah Rymbui haba ïaroh ïa ka jingpynbeit ba dang shen ba ki Deputy Commissioner mynta ki lah ban pyndonkam ïa uno-uno u EE jong ka distrik (lada jia ba ka kam EE ka DRDA ka sah thylli) ban pynsted ïa ki jingmynjur.
“Kumta, ha lade shimet, lada phi ong kumta, ngi donkam ym tang T.2.5 klur hynrei ngi donkam kham bun ban pynbiang ïa ki jingdonkam jong ki paidbah hynrei ka jingkitkhlieh ka dei ban don namarba kam dei ka pisa shimet jong uno-uno u MLA, ka dei ka pisa na ka pla tyngka jong ka Sorkar na ka bynta ka jingmyntoi jong ki paidbah,” u la pynpaw haba pynskhem ba ki MLA ki ïaleh ban ïarap “katba lah” wat hapdeng ki jingeh.
