Shillong, Naiwieng 25
Ka seng Kynthei Unitarian, Union North Eastern India ha ka 25 tarik Naiwieng 2025 ka la pynlong ïa ka prokram ban hikai na bynta ban tehlakam ïa ki kam shah thombor ki kynthei, khynnah kaba la pynlong ha State Convention Centre Shillong.
Haba kren ha ka jingïalang u Principal Secretary ka tnad ka koit ka khiah u Sampath Kumar u la pynpaw ka jingïaroh ïa ka jingpynlong ka seng Kynthei Unitarian Union ïa kane ka prokram da kaba ong ba kum kine ki prokram ki donkam bha ha ka liang ka jingai jingmut bad ka jingpynkhlaiñ ïa ka imlang ka sahlang.
U Sampath Kumar u la ban jur halor ka jingdonkam ka jingïatreilang da kaba ong “Ngi donkam ban wan lang ban wad ïa ki jingthmu ha baroh ki liang ha ka jingim bad kane ka ‘campaign’ ka long kaba kham kyrpang.”
Shuh-shuh u la bynrap ba ka jingkylla ba shisha kan urlong tang lada pynlong ïa ki jinghikai ba man ka por, da kaba ban jur halor ka jingdonkam ban ai jinghikai ïa ki shnong ki thaw ban wanrah ïa ka jingkylla.
U la kyrpad ïa ka kynhun ba pynïaid ba kan ïai-bteng ban trei halor kane ka mat ba kongsan bad ong ba lada kum kine ki jingpyrshang ki treikam bha kan long ka nuksa na ka bynta ban pynkhlaiñ ïa ka imlang ka sahlang bad ïa ka pyrthei baroh kawei.
U la pynthikna ruh ba ka Sorkar kan ïai-bteng ban kyrshan ïa ka Union ha man la ki jingthmu na ka bynta ka jngbha jingmiat ha ka imlang ka sahlang.
U President ka UUNEI u Bah Marki Passah haba ai jingkren ha ka jingïalang u la ong ba kawei na ki daw ka jingshah thombor ki kynthei, khynnah ha ka Jylla ka dei na ka kyiad.
