Jowai, Naiwieng 25
U Myntri ka tnad ïalehkai ka Sorkar Jylla bad uba long ruh u MLA ka Jowai u Bah Wailadmiki Shylla ula pynbna ba ha ka taïew ban wan yn sdang noh ka jingtei ïa ka ‘gallery’ ne ka jaka shong ki paidbah ha Kiang Nangbah Stadium, Jowai bad ka jinglut kan long kumba T. 6 klur.
Ïa kane u Bah Wailad ula pynbna haba kren kum u kongsan ha ka jingïakhun final jong ka lympung ïalehkai 1st Division Football Tournament (Hajan Shylla Memorial Trophy) ba la pynïaid da ka Thadlaskeiñ Sports Association (TSA) kaba la long ha ka lah sngi U Blei ha Multi Sports Complex, Wahïajer.
Ban pynbha pynmiat shuh shuh ïa katei ka madan, u Myntri ula pyntip ba la pynkhreh ïa ka Detailed Project Report (DPR) na ka bynta ban shna ïa ka Synthetic Athletic Track bad ka VIP Gallery.
Nalor kata ula pyntip ruh ba yn sdang noh ban shna sa ïa kawei ka madan Artificial Turf ha ka shnong Mukhla ha ka jinglut kumba T. 8 klur tam khnang ba ki khun samla kin ïoh ban sei madan ïa ki sap ki phong ha ka kam ïalehkai jong ki.
