Jowai, Naiwieng 25
Ka shim por ïa ki pulit jong ka Jylla tang ar bnai tam ban ithuh bad kem ïa ki 3 ngut ki briew na u paidbhur ha ka jingdonkti jong ki ha ka jingbom jingshoh bad jingpynïap ïa uwei u Karbi ha ka por ka jingïakynad jong ki nongshong shnong Lapangap bad nongshong shnong Tahpat ha ka shnong Lapangap.
Kitei ki 3 ngut kiba shah kem ki kynthup ïa u Deibormi Bhoi Lamare na Barato-B, u Evershine Tyngkan na Saba bad u Pyrshang Dkhar na Lapangap bad mynta kine ki 3 ngut ki la shah set ha District Jail ha Jowai.
Kumban shu pynkynmaw hangne, u Orivel Timung uba dei u nongshong shnong jong ka Shnong Tahpat hapoh West Karbi Hills District, Assam u la duh ei la ka jingim katba bun ngut ki nongshong shnong Lapangap hapoh West Jaintia Hills District ki la mynsaw ha ka jingjia ïakynad khappud hapdeng ka shnong Tahpat bad shnong Lapangap ha ka 9 tarik Risaw, 2025.
Katei ka jingïakynad ka la sdang hadien ba ki nongshong shnong Tahpat ki la thung ïa u tynrai dieng ‘Sandalwood’ ha Shnong Lapangap wat hapdeng ka jingpyrshah jur jong ka Dorbar Shnong Lapangap bad ka jingtip jong ki bor pynïaid distrik jong baroh ar distrik.
Ha ka 25 tarik u Jylliew 2025, ki nongshong shnong Lapangap ki la leit jynrat da ka bor ïa kitei ki tynrai dieng ha ka jingsynran jong ki pulit Meghalaya bad ha katei ka sngi ka la mih ka jingther maw da ki jri siat sim na ki nongshong shnong Tahpat.
Ki nongshong shnong Tahpat ki la byrngem ba kin pynthut ïa ka kam rep kam riang jong ki nongshong shnong Lapangap bad kumta ki nongshong shnong Lapangap kim ïoh lad satia ban leit peit ïa u kba ba ki la thung baroh shisnem lynter sha ki jaka markhap bad ka Tahpat.
Ki nongshong shnong Lapangap kiba don ïa ki lyngkha bad pynthor kba ki la hap ban mad ïa ki jingpynthut na ki nongshong shnong Tahpat namar katba ki dang ot kba ki nongshong shnong Tahpat ki la ther maw ïa ki da kaba siat da ki jri siat sim.
Hadien ba ka jingïalang ba la long ha ka 6 tarik Risaw hapdeng ki nongïalam shnong Lapangap bad ki nongïalam shnong Tahpat ha ka jingdon ki bor pynïaid distrik jong baroh artylli ki distrik kam shym seisoh namar ba ki nongïalam shnong Tahpat ki dawa ban dei ban ai lad ïa ki ban thung dieng biang bad kin sa ai lad ïa ki nongshong shnong Lapangap ban ot suk ïa u kba.
Ha ka sngi ba bud, kata haka 7 tarik Risaw, ka Dorbar Shnong Lapangap ha ka jingshong Dorbar ka la aipor arsngi ïa ka Sorkar Jylla ban pyrkhat halor ka jingbym ïoh lad ki nongshong shnong ban ot kba.
Hynrei ha ka jingkutlad bad jingbym banse, ha ka 9 tarik Risaw, kumba 300 ngut eiei ki nongshong shnong ka Lapangap ki la ïa mih ban leit ot kba ha ki pynthor kiba don markhap bad ka shnong Tahpat, West Karbi Anglong hapdeng ka jingpyrkhing pahara ba la pynbiang da ka tnad pulit ka Meghalaya bad Assam.
Katba dang ïaid ka jingot kba, kumba 20 ngut eiei ki nongshong shnong Tahpat ki la sdang ban pynthut ïa katei ka jingot kba da kaba ther da ki jri siat sim ïa ki nong Lapangap bad ki pulit ka Assam kiba don ha katei ka jaka ki la beh ïa ki nong Tahpat hynrei ki khlem phet satia.
Hynrei hadien katto-katne ba ki Karbi ki la siat shi siat jri ban pynthut ïa ki Lapangap bad ki pulit jong ka Meghalaya ki la sdang ban pyndonkam da ki lyer pynsat khmat 4-5 sien sha ka liang ba don ki Karbi.
Hynrei kham hadien la wan poi ki heh pulit jong ka Assam ban ïakren bad hadien ki nong Karbi ruh kila leit phai mar shiteng katba ki Lapangap ruh ki dang ïa ot ïa u kba.
Hynrei ki Karbi ki la hiar biang sha pynthor da ka jingthmu ban ker kut ïa ki pulit, bad ki nongshong shnong Lapangap ki la leit mareh bran-bran ban ïarap ïa ki pulit Meghalaya.
Hynrei kham shiphang ki pulit Assam ruh ki la sdang ban kawang lyer pynsat khmat sha ka liang ba don ki pulit bad Magistrate jong ka Meghalaya.
Kumta ki pulit bad Magistrate ki la mih noh na katei ka jaka ïa-ka-jia bad leit phai sha shnong Lapangap bad ha kata ka por ki pulit Assam ki dang don ha katei ka jaka ban khanglad ïa ki nong Tahpat ban ym tur sha Lapangap.
Hynrei syndet-syndet ki pulit Assam kiba pynsangeh ïa ki nongshong shnong Tahpat ban ym leit sha Lapangap, ki la mih noh kynsan bad leit sha ka Camp ki pulit Assam kaba don haka jaka bala thung ïa u ‘Sandalwood’.
Hadien katto-katne por ki nongshong shnong Tahpat kiba don kumba 200 tam ki la beh thong ïa ki nongshong shnong Lapangap kiba don marshiliang lum.
Khambun ki nongshong shnong Lapangap ki la phet shakhmat hynrei don katto-katne ki nongshong shnong Lapangap kiba sangeh bad ai reng ïa kitei ki nongshong shnong Tahpat khnang ban ïada ïa ki nongshong shnong bad ïa ka shnong ka thaw.
Ha katei ka jingïa aireng mar kylliang, uwei u nongshong shnong Tahpat uba la tip kyrteng kum u Orivel Timung ula duh ei la ka jingim katba katto-katne ki nongshong shnong Tahpat ki la mynsaw malu-mala.
