Shillong, Naiwieng 25
U President ka Butcher Association of Meghalaya, u Bah Esron Marweiñ u la ong ba ka la don ka jingshah pynthut ïa ki kali kit masi ha Ri-bhoi.
Halor kane ka jingshah pynthut ki kali kit masi, na ka liang ka seng ka la leit ban ïakynduh ïa u Superintendent of Police (SP) ka Ri-bhoi District ban pynsngew halor ki jingeh ba ki shem.
Haba kren sha ki lad pathai khubor u Bah Esron Marweiñ u la ïathuh ba ha kine ki taïew ba la dep, ki kali jong ki nongotdoh ki la shah pynphai lut naduh Quinine ka jaka ba ap ki pulit.
Haba pyrshang ban kylli na ki pulit ba balei ki bat, ki la ong beit ban leit kylli na Thanad, namar ma ki ruh ki ïoh ïa ka jingbthah na kiba halor ban bat ïa ki kali kit masi.
U la ïathuh ba na ka liang u SP u la pyntip ba kim don jingwit eiei haba ïa dei bad ki nongotdoh bad nangne sha khmat kan ym don shuh ka jingpynthut, hynrei baroh kiba ot doh haba ki kali ki jong ki, ki mut ban mih na ki ïew die masi, kin sngewbha ban pyntip sha u khnang ba un lah ban leh ïa kaba donkam katkum ka jingbthah jong u SP.
U Bah Esron Marweiñ u la ïathuh “Haba ngi leit sha Thanad, ngi la ïoh jingtip ba ka jingbat ki pulit ïa kine nongot doh kadei namar ba ki nongïalam jong ka Ribhoi Livestock Supplier Association ki la ong ba ki pulit ki shim pisa na ki kali kiba kit ïa ki mar ot doh kata 5 bad 10 hajar tyngka”.
Shuh shuh u la pyntip sha kito kiba khaïi mar Bangla ba lada ki kit ïa ki mar khaïi sha Bangla bad kynnoh pat ïa kiba ot doh, lada ka kynhun kan ïoh bat, kynmaw ka ruh nar ka la ap lypa ha khmat jong ki.
Nalor kata, u Bah Esron u la kyntu ba kim dei ban pynthoh bria ïa ka seng ne ïa ki nongot doh, namar kim tip ïa ka dang ka wai bad kim don kano-kano ka jing ïashun, hynrei kaba sngewsih ka long ‘bam sohphan mano bit thied shano’.
“Ngi la dap ngi la kdang ïa ka jingleh jong kiwei bad ki nongot doh ki kylla ki sohpdung,” u la bynrap.
Kumta u la ong ba ka kynhun nangne sha khmat kan peit pyrman bad kim lah shah shuh bad lada ki dang tuklar nangne sha khmat, kin sa mih sha surok ban leh ïa la ka kamram kaba dei ban leh.
“Ki nongkhaïi mar Bangla ki kit ïa ki mar bad kynnoh pat ïa kiba ot doh, ngin mih surok lada dang shah kynnoh biang. Ngim lah shah shuh ban pynkylla sohpdung ïa ki nongot doh, ngin mih surok lada dang don ki jingshah kynnoh,” la bynrap u Bah Esron.
