Shillong, Naiwieng 25
U Symbud Myntri Rangbah ka Jylla, u Bah Sniawbhalang Dhar u la ban jur ïa ka jingïakren kaba dangïaid shakhmat bad ka Assam halor u pud u sam hapdeng ki ar tylli ki Jylla, da kaba kyntait ïa ki por ilekshon kum ka daw.
Haba kren sha ki lad pathai khubor ha ka sngi Balang jong ka taïew, u Bah Sniawbhalang uba dei ruh u Chairman ka Regional Committee na ka bynta ka West Jaiñtia Hills District u ong, “Ngim ong namar ka ilekshon, ngi ju don ka jingïakren bad baroh arliang mamla. Hooid, lehse namar ka ilekshon, na ka liang ka Assam, ki bunkam khyndiat bad ki ïa bunkam. Ngi la kyrpad ïa ki na ka por sha ka por ban ïa shong lang baroh ar ha kane ka komiti”.
U la pyntip ruh ba u Deputy Commissioner u dang hap ban aiti ïa ka kaiphod halor ka Block-I sha ka Regional Committee.
“Ynda la dep ka kaiphod, ngin sa shim ïa ka rai lano ban pynlong jingïalang shwa bad nangta ngin sa ïakren bad u paralok jong ngi,” la bynrap biang u Bah Sniawbhalang Dhar.
U Symbud Myntri Rangbah ka Jylla u la ong ba baroh ar tylli ki Sorkar Jylla ki la mynjur ban pynneh ïa ka jingsuk ha ki jaka bym pat lah ban pynbeit jong ki jingïapher jingmut.
“Kumba ka long mynta baroh ki long kiba thikna. Na ka Sorkar ngi dang ïakren baroh ar liang mamla ba ka jingsuk kan don ha ki jaka,” u la pynpaw.
