Mawkyrwat, Naiwieng 25
Ka Hynñiewtrep Youth Council ( HYC) Ranikor Circle hadien ka jingleit jurip ïa ka Veterinary Centre ha ka 13 tarik u Nailur, 2025 kaba don ha ka shnong Nongnah, South West Khasi Hills District ka bym shym pat la treikam satia ïa kaba la dep ban tei ïa ka naduh u snem 2015, ka la lap ba kane ka jaka ai jingsumar ïa ki mrad ka la kylla ïing jah ha kaba ki ïit ki la pait lut bad ki kamra ruh ki la sdang ban jot.
Hynrei tang hadien ar bnai ka jingtuklar jong ka seng, ka Sorkar ka la shimkhia ha kaba mynta la dep ban maramot bad pynbha biang ïa kane ka Veterinary Centre.
Ha kaba ïadei bad kane ka jingmaramot, ka seng ka la pynpaw ïa ka jingsngewkmen bad ka la ai khublei ïa ka Sorkar.
Ka seng ka la kyntu ruh ïa ka Sorkar ba kumba ka la pynbha biang ka dei ruh ban plie noh ïa kane ka Veterinary Centre bad ban wanrah noh ïa ki nongtrei khnang ba kan long shisha ka jingmyntoi ïa ki paidbah kane ka dong ka thaiñ khamtam ïa ki nongrep kiba ri jingri.
Ha kajuh ka por, ka seng ka la kyntu ïa u MLA/ MDC ka Ranikor ba un shimkhia lem ïa kane ka kam ba un ïakren lem bad ka Sorkar.
