Shillong, Naiwieng 25
Ka All Meghalaya Primary School Tea-cher’s Association (AMPSTA) hapoh ka jingïalam u General Secretary Bah F.C Shullai bad u President u Dipak Marak, ki la leit ïa shim bynta ha ka jingïakhih (Dharna) ba la pynlong da ka All India Primary Teacher’s Federation (AIPTF) ha Jantar Mantar, New Delhi ha ka 24 u Naiwieng 2025.
Ha ka kyrwoh ba la phah u Bah F.C Shullai u la ong ba ka jingïakhih ba la pynlong da ka AIPTF ka long ban pyrshah jur ïa ka hukum jong ka Supreme Court myn ha ka 1 tarik Nailur (September) 2025, ban phah, ba baroh ki nonghikai Primary School ki dei ban pass ïa ka Teacher Eligibility Test (TET) hapoh 2 snem naduh ba la mynjur ïa kane ka hukum.
“Palat 50,000 hajar ngut ki nonghikai ki la wan na kylleng ki Jylla jong ka ri India ban ïa shim bynta ha kane ka jingïakhih” u la ong.
U Bah FC.Shullai u la ïathuh ruh ba palat spah ngut ki nonghikai na ri Khasi-Jaiñtia bad Garo kiba hap ha ka lama jong ka All Meghalaya Primary School Teacher’s Association (AMPSTA bad APSTA) ki la leit snoh kti lang ha kane ka jingïakhih.
“Kane ka jingïakhih (Dharna) kadei kaba la pynlong da ka All India Primary Teacher’s Federation (AIPTF) ha kaba ka All Meghalaya Primary Teacher’s Association (AMPSTA) bad ka APSTA ki don ka jingïasohlang,” la ong u Bah FC.Shullai.
Ha katei ka sngi baroh kiba wan na ki Jylla bapher-bapher ki la pynpaw ïa ka jingpyrshah halor katei ka rai jong ka Supreme Court.
U Bah F.C Shullai u la pynpaw ruh ba ki nonghikai na Jylla Meghalaya ha ka shatri ka AMPSTA / APSTA kin ai ka jingkyrshan ïa ka AIPTF ban pyrshah ïa ka rai jong ka Supreme Court.
