Shillong, Naiwieng 25
Ka Deputy Commissioner ka East Khasi Hills District ka Kong Rosetta Mary Kurbah ha ka 25 tarik Naiwieng ka la pynmih hukum ban pynjari korphiw miet ha shilynter ki bynta khappud ka Bangladesh na bynta ban tehlakam ïa ka jingwan rung ki riew kieng atiar, ki runar, ki nongkhaïi tuh bad ki kam runar ha khappud.
Kane ka korphiw miet kan treikam ha ki jaka ba jngai 1 kilometre na u Zero Line jong ka khappud ka ban treikam naduh ka por 8 baje mynmiet haduh ka por 6 baje mynstep ka ban ïaid haduh 2 bnai bad ïa kane la pynjari katkum ka kyndon 163 ka aiñ BNSS.
Katkum ka jingpyntip ka DC ka ong ba ka jingpynjari korphiw ka long na ka bynta ban tehlakam ïa ka jingwanrung be-aiñ ki briew na Bangladesh, ki kynhun ki riew kieng atiar, ki nongkhaïi mar be-aiñ bad kiwei pat ki kam be-aiñ kiba lah ban jia bad ka jingdon ki kam sniew ba la thmu lypa namar ka jinglong jingman hapoh ka ri Bangladesh.
Ka hukum ba la pynmih, ka kdew ba ha ki por ba treikam ka korphiw la khang ïa ka ïaid ka ïeng ki briew kiba thmu ban jam sha shilliang khappud, ban ïalum briew palat 5 ngut, ban rah ïa ki tiar pynmynsaw ba kynthup ki dieng, ki maw bad nar, kumjuh yn pyrkhing ïa ka jingdon ka jingshalan mar ba kynthup ïa ka jingshalan masi, shalan ïa ki mar ba long be-aiñ, u kwai, tympew, ki ktung, biri, sikret, slasha bad kiwei.
