Shillong, Naiwieng 25
Wat hadien ki kol ba la thep da u Abhishek bad u Shilanand Lakra, ka kynhun ïalehkai hockey ka India ka la liem noh ha ka jingïakhun kaba tyngeh pyrshah ïa ka Belgium tang da shi kol ha ka jingïalehkai kaba la shah ktah ha ka jingther u slap ha ka lympung Sultan Azlan Shah Cup, ïa kaba la pynkynriah noh sha ka Sngi Ba-ar. Kane ka lympung ka dang iaid shakhmat mynta ha Ipoh, Perak, Malaysia.
Kane ka jingshah rem ka India wat hadien ki kol na u Abhishek (33′) bad Lakra (57′) ka la wan hadien ba u Roman Duvekot (17′, 57′) bad u Nicolas De Kerpel (45′) ki la lah ban thep ïa ki kol jong ki na ka bynta ka Belgium.
Ka India ka la ïakhun tyngeh naduh kaba sdang, kaba la pynshitom jingmut shibun ïa ki rangïalehkai ka Belgium. U nongap kol ka India, u Pawan u la ïakhun tyngeh ban ïada ïa la ka kynhun haba ki rangïalehkai ka Belgium suki suki ki la lah ban pynkhlain ïa la ka rukom ïalehkai. Ka Belgium ka la ïoh ïa ka kabu kaba nyngkong ka jong ka tang hadien 10 minit jong ka jingïalehkai lyngba ka Penalty Corner, ïa kaba ka la lah ban pynbud sa da kawei pat tang hadien katto katne por, hynrei ki rangïalehkai ka India kim shym la ailad ïa ka Belgium ban shim kabu.
Hadien kane ka India ka la ïakhun tyngeh ban ïoh ïa ka kabu thep kol. Hynrei hapdeng kine kiei kiei ka Belgium ka la ïoh lad ban thep kol nyngkong lyngba u Roman Duvekot (17′). Watla u Dilpreet Singh u la ïoh ïa ka kabu ban pynrung ïa ka bol shapoh kol, hynrei u rephri um shym la ai ïa kane ka kol da kaba ong ba ka long kaba lah ban wanrah jingmynsaw (Dangerous Play) bad kumta ka kyllastep ka la kut da kaba ka Belgium ka la tam da 1-0.
Ha ka kylla kaba bud ka India ka la ïakhun tyngeh biang ban ïoh pynphai ïa ka kol bad ha kane ka jingpyrshang u Abhishek (33′) u la ïoh ban thep ïa ka kol ban pynïakhaid ïa ka jingïalehkai. Da kane ka India ka la nang pynjur shuh shuh ïa ka jingtur jong ka sha pyrshah ka kol ka Belgium, hynrei sniewbok pat ba dei ka Belgium pynban kaba la ïoh ban thep kol lyngba u Nicolas De Kerpel (45′) lyngba ka penalty corner ban tam da 2-1.
Ka Belgium khlem pynslem ka la lah ban tam sa da shi kol lyngba u Roman Duvekot (46′). Ka India sa shisien ka la ïaleh ban ïoh pynphai mar mar ïa kane ka kol hynrei ka la pynlehnoh ei noh ïa ka kabu kaba ka la ïoh lyngba ka Penalty Corner tang hadien 10 minit jong katei ka kol. Dei tad haduh ka minit kaba 57 ba u Shilanand Lakra u la ïoh ban thep sa shi kol ïa ka India.
Ka India kan ïakynduh sa bad ka Malaysia ha ka 26 tarik Naiwieng.
