Jowai, Naiwieng 25
Ka Chutwakhu ka la khur jingjop ha ka Super Division Football Tournament na ka bynta ka 17th Kiang Nangbah Memorial ba la pynïaid da ka West Jaiñtia District Sports Association (WJDSA), hadien ba ka la pynliem noh ïa ka Sohmynting da 2-1 kol ha ka sngi Ba-ar ha Kiang Nangbah Stadium, Jowai.
Tang mar ïasdang ka jingïalehkai ka Sohmynting ka la ïoh ban pynkhih jar nyngkong eh lyngba u Dawansuni Suting ha ka minit kaba 3, hynrei ka Chutwakhu ka la lah ban pynphai kylla lyngba u Gladio Susngi ha ka minit ba 20 bad kawei pat da u Wanrilang Lamare ha ka minit kaba 65 hashwa ba kan khur ïa ka jingjop.
Ha ka sngi Ba-ar ka jingïalehkai kan long hapdeng ka Khimusniang pyrshah ïa ka Mooknor Thadmuthlong ha ka por 2 baje nohphai sngi.
