Nongpoh, Naiwieng 25
Ki nongïalam jong ka Ri-Bhoi Livestock and Supplier Association (RBLSA) mynta ka sngi ki la mih shakhmat ban pynshai paidbah halor ka jingkynnoh ba donkti ki pulit Ri-Bhoi ban lum pisa be-aiñ na ki kali kit masi, kaba ki lah dep ban ujor ruh sha u Deputy Commissioner ka Ri-Bhoi myn ha ka 19 tarik mynta u bnai Naiwieng, 2025.
Kane ka jingpynshai paidbah kitei ki nongïalam ka dei hadien ba ki la dep ban ïakynduh ïa u Senior Superintendent of Police ka Ri-Bhoi, u Vivekanand Singh Rathore ban ïakren halor katei ka kam.
U Bah Pynshngaiñ Shylla, President ka RBLSA haba kren sha ki lad pathai khubor, u la pynshai paidbah ba kam don satia ka jinglum pisa be-aiñ da ki pulit ka Ri-Bhoi pyrshah ïa ki kali kit masi, hynrei ka dei tang ka jingsngewthuh bakla jong ki dkhot kiba shah daiñ kuna namar ka jingpynkheiñ ïa ki kyndon aiñ ñiah kali.
U la ong ruh ba ha ka jingïakren bad u SSP ka Ri-Bhoi, ki la ïoh jingshai ba ki pulit ki khlem shim pisa na ki kali kit masi, hynrei ka jingshah daiñ kuna ka dei namar ba ki don katto-katne ki kali ki bym biang ïa ki kot ki sla, kiba pynkheiñ ïa ki kyndon aiñ ñiah kali, kumba ki pulit ka Ri-Bhoi ki la pynjur ka jingtalasi ha kine ki khyndiat bnai ba la dep, ban tehlakam ïa kiba pynkheiñ aiñ ha kylleng ki bynta jong ka Ri-Bhoi District.
Utei u nongïalam ka RBLSA u la pynpaw ruh ïa ka jingsngewkmen ïa ka jingïakren bad u SSP ka Ri-Bhoi, uba la la kloi ban ai ka jingïatreilang bad ka seng nangne shakhmat bad kyntu ruh ïa ki para nongñiah kali ba lada don kino-kino ki jingeh ruh ba kin pyntip sha ki nongïalam ka seng, khnang ba kin lah ban pynbeit ïa kita ki jingeh, ym ban shu kynthoh kulmar khlem da tip ïa ki jingshisha.
