Patna, Naiwieng:
Ka jingwad ïa u President bathymmai jong ka BJP ka Bihar, ka la sdang hadien ba la pynrung ïa u Dilip Kumar Jaiswal, uba mynta ha ka kynhun Myntri jong u Nitish Kumar, kum u Myntri.
U Jaiswal, uba dei u dkhot jong ka ïing dorbar thawaiñ, un hap ban hiar shuki kum u heh jong ka seng, katkum ka polisi ‘uwei, kawei ka kam’. Ki tyllong khubor hapoh ka BJP, ki ïathuh ba ki nongïalam ba rangbah, ki la dep ban sdang ban ïakren, halor u President bathymmai jong ka jylla, hadien ba la pynlong Myntri ïa u Jaiswal, na ka bhah jong ka BJP.
Uwei u nongïalam ba rangbah, uba la shong ktem ha Bihar ha baroh kawei ka ilekshon, la ïathuh ba u la shah bynshet ban jied ïa ki kyrteng jong ki kyrtong kiba lah ban ïakhun ïa katei ka kam.Yn jied lai tylli ki kyrteng bad yn phah sha ki nongïalam pdeng, la ong uwei u heh nongïalam jong ka BJP.
U Janak Ram, uba dei u Myntri barim, u dei uwei na ki nongïalam Dalit, uba ka kyrteng jong u, ka dang ïaid kylleng kylleng, na ka bynta ka kam President jong ka jylla. U Ram, uba dei u nongïarap, u la long mynta u Dalit ba pawnam jong ka BJP ha Bihar.
Shuwa ba un rung sha ka BJP ha u snem 2013, u la don bynta bad ka Bahujan Samaj Party (BSP).
U Ram u la long ruh kum u Myntri ha ka sorkar NDA kaba la dep bad u la long ruh kum u MP na Gopalganj. Lah ban pyrkhat ïa u na ka bynta ka kam President jong ka jylla namar ki Dalit ki don haduh 20 percent na ka jingbun briew jong ka jylla.
U Sanjiv Chaurasia u dei uwei pat u nongïalam uba lah ban shah pyrkhat na ka bynta katei ka kam. U wan na ki jaitbynriew kiba sahdien bha (EBC), kiba don haduh 36 percent na ka jingbun briew jong ka jylla.
U Chaurasia u dei u khun jong u Lat barim ka Sikkim Ganga Prasad, u la jop ilekshon na Digha ha ka sien kaba lai bad u la don ka jingïadei bad ka Akhil Bharatiya Vidyarthi Parishad (ABVP) naduh kaba sdang.
La thung ruh ïa u kum u President ka jylla bad u General Secretary jong ka seng Bharatiya Janata Yuva Morcha bad u la bat ruh kum u nongsynshar jong ka jylla bad kum u General Secretary jong ka seng BJP.
U Mithilesh Tiwari, uba la ïakhun khlem jop ïa ka ilekshon Lok Sabha 2019 na Buxar, u dei ruh u nongïakhun ba khlaiñ bha na ka bynta ka kam President ka jylla napdeng ki nongïalam Upper Caste.
U don ka jingshemphang kaba khraw ban trei bad ka seng ha ki kyrdan bapher bapher bad u la ïoh ïa ka jingkyrshan jong ka RSS.
U Nitish Mishra, Myntri barim bad MLA na Jhanjharpur bad u Vivek Thakur, MP na Nawada, ki dei kiwei kiwei kiba ïakhun hakhmat eh na ka bynta katei ka shuki napdeng ki nongïalam Upper Caste.
Ka jinglong Myntri ki karkhana jong u Mishra ha ka sorkar NDA kaba mynshuwa ka long kaba phylla. U Vivek Thakur u dei u khun jong u nongïalam barim ka BJP u Dr. C. P. Thakur uba dei u Myntri barim ka sorkar pdeng.
U President ba thymmai jong ka jylla, ka lah ban long ba un sa shah thung ha u snem thymmai. Katba ki nongïalam ki dang ïaleh ban pynstet ïa ki jingtreikam lyngba ki kam saiñ pyrthei, uwei pa uwei u peit bniah ïa ka kyrdan kaba ki kwah eh.
