Shillong, Naiwieng 25
Ka Meghalaya Human Rights Commission (MHRC) ka la shim mukotduma ‘suo-moto’ halor ka jingpynslem bad jingbym shimkhia ïa ki arngut ki samla pule ka skulbah NEHU kiba la mynsaw hadien ka jingjia aksiden kali kaba jur kaba la jia ha ka 17 tarik u Naiwieng.
Ka MHRC ha ka Sngi Ba-ar ka la phah ‘notice’ sha ka Director of Health Service (MI) ban pynlong ïa ka jingtohkit bad ban aiti ïa ka kaiphod kaba bniah ha lane shuwa ka 7 tarik Kyllalyngkot, 2026.
Ka samla Stephanie Shadap (22 snem ka rta) bad ka samla Daritngen Poduhkhei (20 snem ka rta) ki dang ïaid najan khyrdop NEHU (Gate-II) hashuwa ki la shah tynrah ha kawei ka kali kaba la pynher sted bha. Baroh arngut ki la mynsaw jur ha ki bynta jong ka khlieh bad ka durkhmat.
Ki bahaïing bad ki samla pule jong katei ka skulbah ki la kynnoh ïa ka Shillong Civil Hospital halor ka jingbym shimkhia bad jingkheiñ sting haba la wan pynkit ïa kitei ki arngut ki samla pule kiba la mynsaw sha katei ka jaka sumar ha ka por kumba 8: 15 baje eiei mynmiet.
Ka MHRC ka la shimkhia halor ki khubor kiba la mih halor ki jingkynnoh ba ki bahaïing hasem bad ki samla pule ki la kynnoh ba ki nongtrei ka Civil Hospital, ki la kheiñ sting ban ai jingsumar ïa kitei ki arngut ki samla pule (ba la mynsaw) haduh ba kawei na ki, ka la phlei snam haduh jan shi kynta.
Hadien kane, ïa katei ka samla kaba la mynsaw la pynkynriah noh sha Nazareth Hospital ha katei kajuh hi ka miet hadien ba ka Myntri barim ka koit ka khiah, ka Dr. M. Ampareen Lyngdoh ka la wan poi ha katei ka jaka.
