Thiruvananthapuram:
Ki don haduh 72,005 ngut ki kyrtong kiba don ha ka jingïakhun ha kylleng ka jylla na ka bynta ka ilekshon local body ban wan, katkum ka jingtip ba shipor ba la pynmih da ka tnad ilekshon jong ka jylla ha ka por janmiet jong ka lah sngi U Blei.
Ka dur kaba khatduh jong ki kyrtong ka la paw shai hadien ba ka por ba la buh ban weng kyrteng ka la kut ha ka lah sngi U Blei.
Ka thup jong ki kyrtong ki kynthup ïa 37,786 ngut ki kynthei, 34,218 ngut ki shynrang bad uwei u briew uba don ka jinglong kynthei bad shynrang.
Katba baroh ki kynhun ba heh ki ïakynduh ïa ka jingma na ki kyrtong ka kynhun pyrshah kiba la kyntait ban weng noh ïa ka jinglong kyrtong jong ki watla ki nongïalam seng ki la pyrshang ban pynjem ïa ki.
Katba ka LDF bad ka UDF ki don mar 5 ngut ki kyrtong pyrshah ha Thiruvananthapruam Corporation, 11 ngut ki kyrtong pyrshah ki wanrah ka jingkulmar khlieh ïa ka kynhun pyrshah ba la ïalam da ka Congress ha Kochi Corporation.
Ka Shyamala S Prabhu, ka Councellor jong ka BJP, kaba la don ha ka shuki hynriew sien, kaba la kylla nongïakhun pyrshah ha kane ka kynti, ka ïakhun pyrshah ïa u kyrtong jong ka kynhun ïatreilang jong ka BJP ha ka Cherlai jong ka Kochi Corporation.
Katba ka UDF ka don 6 ngut ki kyrtong pyrshah ha ka jingïakhun ha ka Thrissur Corporation, saw ngut ki kyrtong pyrshah ki pynkhreh ban ïalehkai pynjot ïa ka LDF kaba synshar ïa ka Civic Body. Ka NDA ba ïalam da ka BJP ruh ka don ïa u kyrtong pyrshah ha Vadookara Ward, ka jaka shong jong ka ha Thrissur Corporation.
Ka Kannur, kaba dei ka Corporation kaba la synshar marwei da ka UDF, ka don ka jingeh jong ki nongïakhun pyrshah na ka bynta ka kynhun ba la ïalam da ka Congress ha ki lai tylli ki jaka. Uwei u kyrtong pyrshah jong ka CPM ha ka Corporation Kannur u la weng noh ïa ka jingïakhun jong u ha ka lah sngi U Blei, da kaba tyrwa jingpynlait ïa ka LDF.
Ka UDF ha Wayanad ka la sngew laitluid hadien ba u nongïalam ka Youth Congress u Jasheer Pallivayal uba la rung sha ka jingïakhun ba pyrshah na ka bynta ka District Panchayat u la weng noh ïa ka jingthep kyrteng jong u ha ka lah sngi U Blei hadien ka jingwan tuklar ha ka minit kaba khatduh jong ki heh nongïalam jong ka seng.
Ha ka Division Ambalappuzha jong ka Alappuzha District Panchayat, ka jingïakynad hapoh ka UDF halor katei ka shuki, ka la lah ban pynbeit, ha kaba ka IUML, ka la mynjur ban weng noh ïa u kyrtong pyrshah jong ka, ha ka minit kaba khatduh.
Ka LDF ka la dep ban ïoh 14 tylli ki seat khlem da don ba ïakhun. Ha Kannur, ka LDF ka la ïoh sa ar tylli ki jingjop khlem nongïaleh pyrshah ha ka sor Anthoor hadien ba la kyntait ïa ki kot thep kyrteng jong ki kyrtong ka UDF ha ka jingbishar bniah kaba thymmai ha ka lah sngi U Blei.
Da kane, 5 ngut ki kyrtong ka LDF ki la shah jied khlem don ba ïaleh pyrshah ha ka Civic Body.
