Shillong, Naiwieng 25
Ka All India Football Federation (AIFF) ka la pyntreikam ïa kawei ka kyndon ba kongsan jong ka riti pynïaid ha ki kam ïalehkai hapoh ka ri hadien ka jingbthah na ka Supreme Court bad kane ka kyndon ka long ban khanglad ïa ki nongkitkam ba kin bat ïa ki kyrdan jong ki synjuk ïalehkai hapoh ka ri bad kumjuh ha ki synjuk jong ki jylla bapher bapher.
Ka rukom pynïaid jong ka AIFF kaba mynta, kaba la ïalam da u President u Kalyan Chaubey, kan nym shah ktah satia ha kane ka jingkylla tad haduh ban sa sdang ka samoi treikam kata ha u Nailur jong u snem 2026.
“Ka All India Football Federation (AIFF) ha ka lah sngi U Blei ka la pdiang ïa ka Article 25.3 (c) bad (d) jong ka riti pynïaid kumba la bthah da ka Supreme Court (SC) jong ka ri India, katkum ka hukum jong ka ha ka 15 tarik u Risaw 2025,” la ong katei ka synjuk ïalehka ka ri.
Kine ki lynnong jong ka riti pyniaid ki kren shai ba ki nongkitkam ka executive committee jong ka AIFF kim lah ban bat ïa kino kino ki kam hapoh ki synjuk kiba don ha ki jylla bapher bapher jong ka ri.
“Ka riti pynïaid jong ka AIFF mynta ka long katkum ki jingbthah jong ka ïingbishar ba ha khlieh duh jong ka ri India bad ka rukom treikam ba la ai jingmut da u nongbishar ba la shongthait u L. Nageswara Rao. Da kane, ka mat kaba dangsahkut naduh u snem 2017 ka la ïeng ha ka jingpynbeit kaba pura,” la ong ka kyrwoh na ka AIFF.
“Ka AlFF ka pynpaw ïa ka jingsngewnguh kaba khraw ïa baroh ki nongshim bynta bad ki nongnoh synñiang kiba ka por, ka jingpyrshang, bad ka jingïatreilang jong ki ka la long kaba kongsan bha ban pyndep hok ïa kane ka kam.”
Ha kaba ïadei bad ka jingpynbeit ïa ki aiñ jong ka FIFA bad ka AFC, ka AIFF ka dangïaineh ha ka kamram jong ka ban kyntiew shaphrang ïa ka phutbol ha kylleng ka ri.”
