Shillong, Naiwieng 26
Ki nongdie sha die soh ba ju tyrwa ha Khyndailad ki la pynpaw ïa ka jingbitar lep ïa ka jingleh jong ki nongtrei ka tnad Shillong Municipal Board (SMB) ba ki la wan ban knieh ïa ki ketli sha, ki kriah jingbam, kriah soh ha ka 26 tarik u Naiwieng 2025.
Ha ka janmiet jong ka 26 tarik u Naiwieng 2025 ki nongdie sha, die soh ba ju tyrwa die ha Khyndailad ki la pynpaw ïa ka jingsngew dom ïa ki Ophisar ka tnad SMB namar ba kim shah shuh ïa ki ban tyrwa sha bad soh ha Khyndailad da kaba knieh ïa ki kriah soh, kriah jingbam, ki ketli sha bad wan pynphai pat haduh ka por janmiet.
Haba kylli ïa ka daw ba balei ka SMB kam shah shuh ïa ki ba kin tyrwa sha, tyrwa soh ha Khyndailad ki la ïathuh ba, ka SMB kam shah shuh ïa ki ban dang tyrwa sha bad soh khlem da ïoh ïa ka Certificate of Vending (CoV).
Halor kane da ka jingjaw ummat ki longkmie ki la pynpaw ïa ka jingsngewdiaw ïa ka jingleh jong ka SMB bad kynnoh ruh ba kane ka jingleh ki briew jong ka SMB, ka dei ka jingkhñiot beiñ ïa kiba duk ba rangli, da kaba pynïap ja ïa ki.
Ki la dawa ruh ïa ka SMB ba ka dei ban ai CoV ïa ki nongtyrwa sha bad soh lada ym shah khlem da ïoh ïa ka CoV.
Shuh-shuh ki la pynpaw ba ka kam jong ki kam pynthut eiei ïa kiwei namar kim shong shi jaka hynrei ki shu tyrwa bad haba ki la dep ai sha, ai soh ki la leit noh.
“Kane ka Sorkar jong ngi ka ñion beiñ tang ïa u ba duk, lada ka kwah ban leh kumne katba ngi dang bat ïa ki aiñ ki rul, baroh khoit ngin ïa mih biang shabar” la byrngem ki longkmie.
Ki la ong ba ïa mynta ki la kohnguh ïa ka jingpynïaid ka Sorkar hynrei katba ki dang ai ka jingïatreilang bad ka Sorkar da khongpong ka Sorkar ka dang ïaleh ban ñion.
Kum ban shu kdew, ka tnad Shillong Municipal Board dang shen ka la lah ban pynkynriah ïa baroh ki nongshnong die madan ha Khyndailad sha khrum ka Meghalaya Urban Development Authority bad la sakhi ba ka Khyndailad ha kine ki khyndiat bnai ka la kylluid ha ka ïaid ka ïeng ki nongleit nongwan.
