Shillong, Naiwieng 26
Ka kynhun ki ‘thei ïalehkai kriket ka Jylla ka la lah ban pynliem noh ïa ka Manipur da 19 ron ha ka lympung ïalehkai U-23 Women’s T20 Trophy 2025-26 ba la long ha ka sngi Ba-ar ha Agartala.
Ïa kane ka jingïakhun kaba la hap ban pynhiar noh sha ki 9 over, hynrei na ka liang ka Suriti Kumari Ray ka la ïeng ban ïakhun tyngeh na ka bynta ban kamai 33 ron bad ïai neh haduh kaba kut na ka bynta ban seng ïa ka nongrim ba khlaiñ ïa ka Meghalaya ban kamai 69 ron hadien ba la shah pynhap 5 wiket.
Haba la dei pat ka pali ban wan beh ïa kane ka thong, ka Manipur ka la lah ba kan kamai tang 50 ron hadien ba la shah pynhap wiket baroh ki nongtied ha ki 8.5 over. Ka Niruta ka kylla long tang ma ka, kaba la lah ban kamai bun ron na ka bynta ka kynhun kata 11 ron hashwa ba kan shah pynkhyllem noh ha ka Nerisa Nongrum.
Katba ki wiket ba sah ka Manipur don napdeng jong kiba la shu ‘run out’, hadien ba ki la kwah palat ban jam sha u line jong ka jingjop, kaba hangne ka Indariakor Kharwanñiang marwei ka la don bynta ha ki lai tylli ki ‘run out’ bad bynrap lang sa ka Ritreki Pohshna, Janika Marak, Abiezer Kharsyiem bad Surit, kiba la ïoh mar kawei ka ‘run out’.
