Shillong, Naiwieng 26
Ki nongdie jingdie madan hajan ka Civil Hospital Shillong ki la pynpaw ba ka Sorkar ka la pynkhreh ïa ka jaka na ka bynta jong ki, ha syndah ka Ophis PWD na ka bynta ban pynkynriah shipor ïa ki, hynrei haduh mynta kim pat ïoh ka jingbthah ba ki hap ban kynriah.
Ki la ong ba ki pdiang ïa ka jingkwah ka Sorkar ban pynkynriah shipor ïa ki, hynrei ki la dawa ba dei ban don ka jingïasoi lane ka jingïateh kular hapdeng ka SMB bad ki nongdie madan ha shuwa ban pynkynriah ïa ki sha katei ka jaka ba la pynkhreh.
Ki la pynpaw ba kim don jingshaniah ïa ka Sorkar bad ong ba ka Sorkar ka dei ban leh kumba ka la ong ban pynkynriah ïa ki tang shipor bad kin ïoh biang ban shong die jingdie sha kajuh ka jaka hajan Civil Hospital Shillong.
Haba kren sha ki lad pathai khubor u Bah Shane Thabah, Asst Secretary jong ka Meghalaya Greater Shillong Progressive Hawkers and Street Vendors Association (MGSPHSVA) u la ïathuh ba ka Sorkar ka shim kyrteng tang 29 ngut, katba ki don haduh 43 ngut kiba ju im ja kpoh na kaba die jingdie hajan ka Civil Hospital Shillong.
U la ong ba kane ka jingthmu pynkynriah ïa ki nongdie madan na Civil Hospital sha ka jaka ba don ha phyllaw ka Ophis PWD kaba don ha Barik kam dei ban long kum ha Khyndailad namar ki don kiba ïoh CoV ki don pat ki bym ïoh, ba ïoh kane ka wanrah ka jingkulmar.
