Shillong, Naiwieng 26
Ka Sorkar Jylla ha ka Sngi Balang ka la pynbna ïa ki kyndon kiba kham pyrkhing na bynta ki kali Sorkar, da ka jingthmu ban tehlakam ïa ka jingpyndonkam bakla ïa ki ‘siren’, ki ‘beacon’, bad ka jingtah ïit-ïong.
“Ka Kynhun Myntri ka la mynjur ïa ka jingtyrwa ban pdiang ïa ki kyndon treikam (SOP) haba ïadei bad ka jingpyndonkam ïa ki ‘beacon’, ki jingpynthaba (Flasher), ki ‘siren’, ki ïit-ïong bad kiwei-kiwei ha ki kali Sorkar. Ha ka jingkren lyngkot, kaei ka jingmut jong kata, ka long ba mano ba lah ban pyndonkam ïa ka ‘siren’ bad mano bym lah, bad mano ba lah pyndonkam ïit-ïong, kumjuh mano ba lah ban don ïa ki jingpynthaba (Flasher) – baroh kita ki bynta la ïakren bad ka don ka jingsngew kaba jur hapdeng ka Kynhun Myntri ba ka long kaba donkam ban don ïa ka rukom treikam ka ban tehlakam bad pyrkhing ïa ka jingpyndonkam ïa kum kine ki jait ‘siren’ ha ka jingïaid lynti baroh kawei,” ong u Myntri Rangbah ka Jylla, u Conrad K. Sangma ha ki nongthoh khubor hadien ka jingpynïaid ïa ka jingïalang jong ka Kynhun Myntri kaba nyngkong eh kaba la pynlong ha Nan Polok.
U la pyntip ba ïa ki kali jong kito kiba hap ha ka thup kyrdan ‘Z+’ yn shah ban pyndonkam ïit-ïong bad ïa ki ‘siren’ lah ban pyndonkam tang da ki kali pulit, ‘Emergency Services’ bad ki kali synran ne ‘Pilot Escort’ jong ki VVIP bad VIP.
“Ha kaba ïadei bad ki bording pynthaba bad ki ‘beacon’, ngi la kren shai ba ïa ki bording pynthaba ba saw ne ki ‘lait-saw’ bad ki ‘beacon’ yn ym shah ïano-ïano, kata ka dei ka aiñ jong ka ri. Ki jingpynthaba ne ‘Flasher’ kiba pyndonkam bujli – kane kan long tang da ka jingpynbna ba kyrpang jong ka tnad Transport. Tang kito kiba la pynbna da ka tnad Transport ki lah ban pyndonkam ïa ki ‘Flasher’ hynrei kane ruh, lah ban leh tang ynda ka tnad Transport ka la pynmih ïa ki jingpynbna,” u la ong da kaba bynrap ba ka ophis jong u Myntri Rangbah (jong u) kan thoh ruh sha ka tnad Transport ban ïoh ïa ka jingbit kaba donkam.
U Conrad u la ong ba ka komiti kaba la khlieh da u Principal Secretary ka la long kaba la khreh haba ïadei bad kane ka bynta.
“Lada don kino-kino ki thup kyrdan kiba donkam ban shah kynthup lang, kane ka komiti ba la khlieh da u Principal Secretary kan ïoh bor ban pynbna lada don kino-kino ki ‘riew shimet ne ki thup kyrdan kiba dei ban shah kynthup lang,” u la ong.
Halor ka jingpyndonkam ïa ki ‘Name Plate’, u Myntri Rangbah u la ong ba ka tnad Transport kan sa pynbna ïa ka thup kyrteng jong ki briew kiba dei hok ban pyndonkam ïa ki ‘Name Plate’.
Shuh shuh u la bynrap ba ka jingpyndonkam ïa ka lama ka ri kan long katkum ka ‘Flag Code of India 2002’ bad ki SOP.
