Shillong, Naiwieng 26
U Cristiano Ronaldo u lah ban lait na ka jingshah pynduh ïalehkai na ka bynta ka Portugal ha ka World Cup 2026 watla u la ïoh red card ha ka lympung ïaknieh (qualifying) namar ba u la kyrsah da ka tymbuit pyrshah ïa u rangïalehkai ka Republic of Ireland.
Ka FIFA ka la pynmih ïa ka rai ha ka sngi Ba-ar kaba la khang ban ïalehkai ha ki lai tylli ki jingïakhun, hadien ba ka la bishar ïa ka jingleh jong u Ronaldo kum ka “jingleh donbor”, hynrei ïa ki ar tylli na kita ki jingïalehkai la pynsangeh noh na ka bynta ka jingpynshitom kaba shisnem.
U Ronaldo u la shah sospon na ka bynta kawei ka jingïalehkai ha ka por ba ka Portugal ka la ïalehkai ïa ka jingïalehkai ba khatduh jong ka ha ka taïew ba la lah, ha kaba kala jop da 9-1 kol ïa ka Armenia kaba la pynskhem ïa ka jaka jong ka ban ïoh rung sha ka World Cup ka ban long ha North America.
La khmih lynti ba une u khlur ïalehkai un shah sospon sa shisien hashwa ba yn pynkhreh ban ïashim bynta ha ka sien kaba hynriew ha ka World Cup.
Ka FIFA ka la kdew ïa ki kyndon pynshitom jong ka kiba ailad ïa ki bynta jong ka jingpynshitom, watla ka long kaba duna bha ha ki khep ba la khang ïalehkai na ka bynta lai tylli ki jingïalehkai ha kaba lah ban pynjlan.
Ha ki ar tylli ki jingbishar da ka FIFA mynta u bnai, ki nongïalehkai na Armenia bad Burundi ki la shah sospon ban ïalehkai na ka bynta lai tylli ki jingïalehkai hadien ba ki la ïoh red card namar ki kam leh donbor ha ki jingïalehkai ïaknieh rung World Cup bad ym don uwei ruh uba la ïoh ïa ka jingpynduna halor ka jingshah pynngat.
“Lada u Cristiano Ronaldo u leh biang ïa ka jingpynkheiñ aiñ kaba kum kane ka jinglong wat hadien ba u la ïoh jingsneng, ïa ki ar tylli ki jingïalehkai yn sa pyntreikam kat kum ki kyndon aiñ,” la pynpaw kat kum ka kyrwoh jong ka FIFA.
Ka FIFA ka don ka bor ban pynshitom ïa ki jingïalehkai jong ki kynhun bad ka Portugal ka dei ban ïalehkai ar tylli ki jingïalehkai paralok ha u bnai Lber, nangta ka lah ban long kawei ne ar tylli ki jingïalehkai kilanmet ha u Jymmang lane Jylliew. Ka World Cup kaba la pynlong lang da ka America, Canada bad Mexico kan sdang ha ka 11 tarik u Jylliew.
Lah ban pynkynmaw, u Ronaldo u la kyrsah da ka tymbuit ïa u rangïalehkai ‘dien ka Ireland u Dara O’Shea ha kaba ka Portugal ka la shah rem da 2-0 kol ha Dublin ha ka taïew ba la lah. Kane ka long ka red card kaba nyngkong ïa u Ronaldo ha ki 226 tylli ki jingïalehkai bar ri. U la shah beh na madan haduh 13 sien ha ki jingïalehkai na ki klob.
