Brooklyn, Naiwieng:
Ka ïingbishar jong ka sorkar pdeng jong ka US ha Brooklyn, ka la ai ïa ka bai lutksan kaba haduh $82 million sha kawei ka samla pule na Brazil, kaba 29 snem ka rta hadien ba ka la duh noh ïa ka kti kadiang bad ka kjat kadiang jong ka, ha ka jingjia ba sniewbok hapoh ka subway ha u snem 2016.
Ka Luisa Janssen Harger Da Silva, katba ka dang leit jngoh kai sha ka nongbah New York bad ka dang ïeng ha kawei ka rynsan bad u samla jong ka, ha ka Metropolitan Transportation Authority (MTA), kynsan, la ong ba ka Luisa ka la ïapler bad ka la hap shapoh ka lynti ïaid rel, ha kaba, ka rel kaba wan pyrshah ka la tynrah ïa ka, kaba la pynlong ïa ka ban mynsaw jur na ki bynta jong ka kti bad ka kjat kadiang jong ka.
Ki nongïasaid aiñ jong ka Luisa, ki la kynthoh ba ka MTA ka don ïa ki jingtip ba pura hadien ba la wad bniah bha mynta la 15 snem, kiba pyni ba ki briew ki long suk bha ban hap ha ki lynti iaid rel bad watla katta ruh kim shym la shim khie ne wanrah ïa ki lad jingïada, kum ka jingbuh ïa ki jingkhang ha ka tduh jong ka jaka iaid rel. Kumta, u David Roth, u nongïasaid aiñ jong ka Luisa, u la ong ba ka jingleh bym suitñiew jong ki bor pyniaid wat haba ki tip ba katei ka jaka, ka long ka bym shngaiñ bad kaba ki briew ki lah ban ur ne hap da kaba suk, ka long kawei na ki jingpynkheiñ aiñ bad ka jingbuh jingma ïa ki paidbah nongleit- nongwan baroh.
Ka kynhun bishar, ka la leit sha ka liang jong ka Da Silva, kaba dang 21 snem ha katei ka por, ha kaba ka la ai khusnam ïa ka, haduh $82 million. Hynrei ka MTA ka la ujor, da kaba ong ba kam ïahap ïa katei ka rai, da kaba pan na ka ïingbishar kaba kham heh ban bishar bniah bha haba ïadei bad katei ka kam.
Ki kot ki sla kiba hapoh ki la pynpaw ba la tyrwa ïa ka MTA ban buh ïa ki jingkhang platform khlem da siew pisa naduh u snem 2011.
“Katto katne na kita ki kompeni, kiba heh tam ha ka pyrthei, ki la ai ïa ki plan kiba bniah kiba pyni ba ki lah ban jop ïa kawei pa kawei ka jingeh ha ka kam engineer bad ban buh ïa ki jingkhang platform screen ha ka system baroh kawei,” la ong u nongïasaid aiñ jong u Da Silva, u Bob Genis.
Ki kompeni heh, kum ka Faiveley Transport, ki la aiti ïa ki plan ba bniah kiba pyni ba ka long kaba lah ban buh ïa ki jingkhang wat hapdeng ka jingpynkhreh ïa ki surok poh khyndew ha New York. Ka MTA ka la khot wat ïa kawei ka plan “kaba sngewtynnad”. Hynrei, ym shym la don shuh ka jingpule ne jingpynrung, bad ka MTA ka la “leit noh” na ka jingai khlem jingsiew, la ong u Genis.
U nongmihkhmat u Tim Minton u la ong ba kim lah ban batai ïa ki rai ba la shim bun snem mynshwa, namar ba ka MTA ka la buh katto katne jait ki jingkhang platform ha ki 109 tylli ki steshon haduh mynta. Ha ka jingbishar jong ka iingbishar, ka MTA ka la kynthoh ba ka jingai platform-kyrdop khlem jingsiew jong u snem 2011 kam shym la pynskhem pura ha katei ka por.
U Minton u la ong ruh ba ka jingbuh ïa ki jingkhang jong ki platform ha kiba bun ki steshon kan ym treikam namar ka jinglah ban pyntreikam ha ka met bad ka jinglah ban ioh rung.
