Ha ka jinglong briew, ngi leh bun ki kam ki jam da ka jingshitkhlieh bad ka jingbym pyrkhat ïa kaei ka ban jia lashai lashisngi. Ka jingbamja khluit ka long kaba ma haduh katta-katta namar bunsien ka wanrah ïa ka jingbabe kylla. Hynrei kan ym don jingmyntoi lada ngi babe sa katno-katno ruh namar ym lah shuh ban ïaleh eiei. Katba ka snam ka dang khluit, ngin ym pat pei phang, hynrei shisien ba ka sdang ban pjah, hangta kan wan ka jingsngewthuh kaba kham shai ka ban pynlong ïa ngi ban babe kylla ïa kaei kaba ngi la leh da ka jingshitkhlieh. Balei pat ngi dang leh ïa ki kam ki ban pynbabe kylla? Ngin kynnoh beit ïa ka jinglong briew namar ka kham suk. Hynrei bunsien kiba kylla sohpdung jong ki kam shitkhlieh ki dei ki briew ba lui-lui, ki bym ïadon bynta eiei bad kiei-kiei. Ki shu ngat la ka ngat ha ka jingshah tangon khlem kano-kano ka daw. Ngi la ïohi ïa kiba kum kine na ka por sha ka por, hynrei ngim kwah pat ban pule na ka mynnor bad ka jinghikai kaba ka ai. Shu ïa pyrkhat beit tang ïa kaba mynta bad kaei kaba don hakhmat. Ïa kaba la dep bad ïa ka ban sa jia shakhmat, ki duna kiba sngewthuh bad kiba pyndonkam ïa ka jabieng. Leh shitkhlieh ki katto katne ngut, shah kynnoh lang baroh bad hap ïa saja lang baroh salonsar. Kane ka long kaba ma.
Bun na ngi, ngi tip ba ka pyrthei ka la nang rit na ka daw jong ka jingkiew sted ki kor ki bor kiba wanrah ïa ka jingïajan hapdeng ki para briew. Kam shimpor ban tip aiu jia ha Shillong ïa ki briew kiba shong ba sah sha America namar ki don ki kor ki bor. Ki rynsan ‘Twitter’, ‘YouTube’, ‘Facebook’, ‘Instagram’ ki dei ki atiar kiba lah ban pynsaphriang ïa ki khubor kynthup lang ïa ki khubor lamler bad ki khubor pynheh thma. Ïa kino-kino ki jingjia ha kino-kino ki bynta jong ka sla pyrthei lah ban tip, ïohi bad pule tang hapdeng katto katne minit. Kam dei shuh kum ka juk maw. Kato ka juk ka la kut. Mynshwa, ngin hap ban ap da ki sngi bad ki taïew ban tip bha ïa ki jingjia. Mynta kam donkam.
Ha kajuh ka rukom, lada don kano-kano ka jingjia, la ka dei kaba sngewbha ne kaba sngewsih, ha kano-kano ka bynta jong ka Meghalaya, ki briew mynta kin tip beit. Ban buhrieh ka dei kaba eh ha kane ka juk stad. Lada don ka jingleh bakla, hangta ngin shah kynnoh ha ban da biang na kiba bun ki liang. Lada don ka jingbamja khluit, hangta kiwei kin ïoh ïa ka lad ban khyrwit ïa ngi ha ban da jem jai. Kam myntoi shuh ban babe namar ka la dep jia bad kaba eh bha ban pyndam ïa kaei kaba la mih shabar khamtam ha ki rynsan ‘Social Media’. Namarkata, ngin hap long kiba adkar bha bad kiba pyrkhat jngai hashwa ba ngin leh ïa kano-kano ka kam khamtam da ka jingshitkhlieh. Ym dei tang kito kiba leh shitkhlieh ki ban shah kynnoh laiphew jait laiphew skit. Kiwei ruh ki bym tip ïa ka ‘dang ka ‘duh kin ngat lang ha kajuh ka apot. Long kiba jai-jai bad pyni ïa la ka nia ka jutang bad ka nongrim da ka lynti kaba shonghok bad ka bym ktah ïano-ïano lane ka bym wan kyrtoh kylla ïa ngi.
Ngim dei ban long ka daw na ka bynta kiwei ba kin woh dong woh kjat ïa ngi. Wat ailad ba kin ïoh daw namar shisien ba la ïoh, kan eh bha bad ngin ïa ngat lang ha ki jingjynjar kiba bun rukom. Tangba bunsien ka ju long kumta. Lada leh uwei ne arngut, ka jingkynnoh ka ju leit lang sha baroh. Kita kiba leh ki lah ban sngewbabe kylla, hynrei kan don jingmyntoi aiu pat? Ka don ka ktien kaba ong: Kam myntoi ban babe ïa ka dud kaba la hoit lut sha madan. Kane ka dei ka jingshisha. Mano shuh ba lah ban pyndonkam ïa ka dud ba la hoit sha madan? Sa tang ka miaw hi ka ban kmen toh hoh katba uba duhnong u dei uta uba la pynkhreh ban dih ïa ka dud. Ki ju ong ruh ba dei ban pyrkhat shispah sien shwa ban leh ïa kano-kano ka kam. Kane kam mut ba ngin hap ñiew haduh ban da dap shispah, hynrei ka thew sha ka jingdonkam ban pyrkhat jylliew hashwa ba kin ryngkoh shano-shano lane leh ïa kano-kano ka kam. Ka dei ka jingkyntu ïa baroh lang ban ïa long kiba adkar bha khamtam ha ki kam paidbah namar ngim kwah ba kan wan ka jingbabe.
