Bashaiborlang Majaw, Umthli Laitlyngkot
Ka jingieid jong ki arngut ne ki jingieit shi tnga, ka long kaba khraw bad kaba bha. Ba ngin pynneh ne pynim ïa ka, namar ïa ki arngut la teh da ka jingieid ba kin ïa long kawei kumta ban skhem ka jingieid to ngin ïa pyndem markylliang, Iwei ïa iwei, ha u Blei ka nongrim basdang jong ka jingieid shi tnga jong ki arngut. Kumba u Khrist u ieid ïa ka balang ka kurim jong u. Kumta ngi ruh ngin ieid ïa la ki kurim jong ngi.Khlem buh kyndon ngi ki shynrang ngin ieid ïa ki tnga jong ngi da ka dohnud jong ngi baroh. Bad ngi dei ban aiti ïa la ka jingim na ka bynta jong ki. Kumba u khrist u aiti na ka bynta ka balang. Ki kamram u shynrang kum u khlieh jong ka tnga jong u ne u kpa ka ïing ka sem, u dei ban don ïa ka jingkit khlieh halade, ym ha kiwei pat (kiaw ne kthaw) kumta u dei ban peit katkum ka jingidonkam ka jong ka, u dei ruh ban ïaraplang ïa ki kam ki jong ha lada u ioh por. Kane ka pynpaw ïa ka jingieid shitnga. Ki kamram ki kynthei ïa la u tnga jong ki kum u khlieh jong ki ki dei ban burom ïa u kat kaba lah naduh ki ktien ki thylliej kiba jem, ym kiba khor. To pynpaw barabor ïa ki khmat baphuh samrkhie jong phi ha u tnga jong phi, ban ai jingkmen ïa ka dohnud jong u, naba ki shynrang baroh ki ba la shongkha, ka mynsiem jong ki ka don ha ki tnga jong ki, lada ki tnga ki nang ban burom ïa ki, ki shynrang ki wad ïa ka burom na ki tnga jong ki bad ki tip ruh ka burom jong ki ka dei ka jingieid ba ki ai ha ki man ka sngi.
Kumno kim ju thad ban trei shitom man ka sngi lada phi nang ban burom ïa ki. Naba ngi iohi ba ha kine ki juh jong ngi mynta ha ka burom ka la jah bad ka jingïatiplem ka la ïap hapdeng ki ar ngut shitnga, ngi iohi ïa ka burom bad ka jingieid, tang ha ki por ba ngi dang long tang shi samla, bad hadien ba ngi la ïa sahlang pat kine baroh kila jah (Hato ka dei ban long kumne). Ban im ka burom bad neh ka jingieid ngi dei ban phai sha u Blei, uba la tehlang ïa ngi nyngkong ki sngi da ki jingkular. Ki jingpynskhem bad ki kular, ka long ka jingshisha ha ka jingïadei shitnga, ong u Khasi khara. To ngin kynmaw ba ka jingieid ba janai ka bret noh ïa ki jingsheptieng jingkhuslai (Shithi I 4 : 18) bad ka jingieid markylliang ka pyndep ïa ka aiñ u trai (Rom 3 : 8-10) bad ka long ruh ka dak jong u Blei, ha ngi iwei pa iwei, kumta ka jinglong shi-tnga, kawei ka doh, ym shuh ar, kumba long u khrist bad ka balang. U tnga uba ieid ïa la ka tnga u ieid ïalade ong ka ktien ki riew tymmen, u sumar ïa ka kum ka jingai sngew-bha u Blei ïa u, bad ha ka juh ka rukom ka tnga ruh ka dei ban leh, naba ka dei ka hukum u Blei bad tang kawei ka tnga bad uwei u tnga. Shi jingim, ym ban bujli kum ki mar ki mata, ne kumba leh ki riew pyrthei jong kane ka juk, ba kim hun shuh tang kawei ka tnga naba ki phong da ka mynsiem jong ka jingawria, to sumar ka hukum u Blei,ba phin ym hap ha ki jingpynshoi jong kane ka pyrthei ba mynta (To sharai bad to duwai).
Haba wan kano kano ka jingpynshoi to kynmaw ïa ki jubanlak ba la khlei hakhmat u Blei, bad ha khmat ki sakhi sathor baroh, ba phi ong ngan ieid ïa phi la suk ne shitom, la duk ne kyrduh la phi koit ne phi pang ngan ieid ïa phi shaduh ka kut ka jingim jongnga. Kane ka kyntien I Love You ka don ïa ka jingmut ba jylliew lada ngi pyrkhat bha ïa ka, namar ka don ïa ka jingmut ba ïar bad bha bun syrtap ha ka, lada ngi ong nga ieid ïa phi ka sting, bad lada ngi ong pat I love you ka khia thew. Namar kata ka jingkhia thew jong kane ka kyntien la pynlong ïa ka, baroh ki jaitbynriew kim sngewtynnad ban pyndonkam ïa ka, nyngkong ka wan na u Blei u ba ong nga ieid ïa ka pyrthei. I love you, nga ieid ïa u briew I Love you nga ieid ïa uba duk I love you. Nga ieid wat u nongpop bad kumta ter ter. Kumta ban ieid kam dei kaba bakla bad ban map ngin pyndonkam katba mon u ne ka briew ki don ki jingduna ha ki, kumta ngin pdiang ki jingduna kiwei ban wan lam biang ka jingieid bajanai. Ka jingïadei jong ngi shi tnga ha ïing hasem shi kmie shi kpa bad ki khun, ki hynmen para shi shnong shi thaw ka imlang sahlang bad ka Balang kan neh kan skhem lada ngi ieid iwei ïa iwei.
