Shillong, Naiwieng 26
Ka Federation of Khasi Jaiñtia & Garo People (FKJGP) Sengkmie ka pynrem jur ïa ka jingleh jong ka Shillong Municipal Board (SMB) ban khanglad ïa ki nongdie sha kiba ïaid ban tyrwa sha bad jingbam ha ki bynta jong ka Khyndailad kiba dei ki trai ri trai muluk da ka jingkam ba ki dei ban ïoh jingbit shwa na ka tnad Municipal Board lyngba ki kot ki sla kiba biang.
Ha ka kyrwoh khubor ba la pyllait da u Vice President ka FKJGP Sengkmie u Bah Kitboklang Nongphlang u la ong, katei ka jingleh jong ka tnad Municipal ka long pyrshah ïa ka hok kamai jakpoh jong ki trai ri trai muluk namar kiba rit ba ria kiba im sngi da kaba shu ïaid tyrwa sha kylleng-kylleng ka long ka jingïuhroit bad ka jingthombor im-im peit-peit khlem kano-kano ka jingsngew briew.
U la ong, lada ka Sorkar Jylla ka don kano-kano ka jingthmu na ka bynta ka bit ka biang jong ki paidbah kala dei ban pyrkhat sani bin-pa-bin hashwa ban shim ïa kino-kino ki sienjam kiba ktah ïa ka kam kamai jakpoh jong ki trai ri trai muluk. Katei ka jingleh donbor jong ka tnad Municipal lehse ka dei tang ka buit poh ban pynhun ïano re ïano da kaba ïa sylla ban khñiot beiñ ïa ki longkmie Khasi na ka bynta ka jingmyntoi shimet jongno re jongno.
Kum ka seng kaba ïeng ban ïada ïa ka hok jong ki trai ri trai muluk kam lah satia ban shu shong kli kti lane ban shu peitkai halor kine ki jingjia hynrei kan sa bishar bniah ban tih jylliew ïa kine kiei-kiei baroh ban lap ïa ki jingshisha bad na ka liang jong ka seng kan sa shim ïa ki sienjam ki ban pyntikna ban pynïoh pat ïa ka hok jong ki trai ri trai muluk.
Ha kajuh ka por na ka liang jong ka seng ka maham jur ïa kino-kino ki tnad jong ki bor Sorkar kiba pyrshang ban thombor ïa ki trai ri trai muluk ha ki dur bula ki bapher-bapher na ka bynta ka jingïohnong jong ki briew kiba nabar, la pynkut ka kyrwoh na u Bah Kitboklang Nongphlang.
