Shillong, Naiwieng 26
U Myntri Rangbah ka Jylla, u Conrad K. Sangma u la pynbna ïa ka jingmynjur jong ka Kynhun Myntri ban thied jaka na ka bynta ban ïabujli bad ki jaka ka tnad ïada ri, ka sienjam kaba kongsan haba ïadei bad ka jingpyntreikam ïa ka projek ban pynheh ïa ka Kad Liengsuiñ Shillong.
Haba kren sha ki nongthoh khubor hadien ka jingpynïaid ïa ka jingïalang ka Kynhun Myntri kaba la long ha Nan Polok ha ka Sngi Balang, u Sangma u la ong, “Ngi la shim ïa ka jingtyrwa ban thied jaka na bynta ban ïabujli bad ka jaka ka tnad ïada ri na ka bynta ban pynheh ïa ka Kad Liengsuiñ Shillong. Ngi la ai ïa ka jingmynjur kaba pura ban ïaid shakhmat bad kane namarba ka long kaba donkam ban pynheh ïa ka Kad Liengsuiñ Shillong khnang ba lah ban pdiang ïa ki liengsuiñ kiba kham heh.”
Ha kajuh ka por, u la pyntip ba u Symbud Myntri Rangbah ka Jylla ba dei peit ïa ka tnad Transport, u Bah Sniawbhalang Dhar un sa ïakren bad ki paidbah nongshong shnong lem bad ki Rangbah Shnong na ka bynta ka jingthied bad ka jingïabujli jaka kaba ïaid-beit ïaid-ryntih.
U Myntri Rangbah u la ïathuh ba yn sa pynlong ruh ïa ka jingïalang ha ka Sngi Thohdieng ban pynbeit shuh-shuh ïa ki jingeh kiba la pynsngew da ka Directorate General of Civil Aviation (DGCA).
“Nga dang shu ïakynduh ïa u Myntri bad ki heh ophisar na ka Airport Authority of India (AAI), Civil Aviation bad na ka DGCA bad kan sa don ka jingïalang ha ka Sngi Thohdieng ha kaba donkam ban pynbeit ïa ki mat. Ngi khmih lynti ba hadien kata ka jingïalang, yn sa pyni dak ban ïaid shakhmat bad ka jingkhot ‘tender’ bad ngi khmih lynti ba u kontraktor un don lang hajuh – ïa kane ruh yn sa leh da ka AAI hashuwa kaba kut jong une u snem bad hadien kata, yn shim por 15 bnai ban ïaid shakhmat bad ka jingpynheh ïa ka lynti ïaid liengsuiñ bad ngi khmih lynti ba ha u bnai Lber, 2027, kata kan sa jia,” u la ong.
“Ïa mynta, ki don ki jingeh bad ki jingsngewkhia ha kaba ïadei bad ka jaka hiar liengsuiñ bad kiwei-kiwei kiba ka DGCA ka la kdew kaba ngi donkam ban khmih kumno ban pynbeit ïa baroh kita ki jingeh. Ka jingïalang ha ka Sngi Thohdieng kan sa urlong bad ngi dang ïatreilang halor kata,” la bynrap shuh-shuh u Conrad.
