Jowai, Naiwieng 26
Haduh 59 ngut ki khynnah skul ka Jawahar Navodaya Vidyalaya (JNV), Rymbai ha East Jaiñtia Hills ki la kem pang kynsan bad ïoh ïa ka jingshitom prie pynhiar kpoh ïa kaba la suba jur ba ka dei na ka jingbam ïa ka bam kaba la sniew ba la ai sha ki.
Ka Jaiñtia Students’ Union (JSU) lyngba ka kyrwoh ka pyntip ba kane ka jingjia ka la jia naduh ka 22 tarik Naiwieng ha kaba ka la pynrem jur ïa ka rukom pynïaid kam ba thurmur jong kane ka skul.
Ka Seng ka la ai por ruh 15 sngi ïa ki bor ba dei khmih ba kin leh eiei halor kane ka jingjia.
Ka JSU hapoh ka jingïalam jong u Khynroo Bocheru Mi Pohsnem Education Secretary, ka la hiar jurip mardor sha katei ka jaka mar ïa ïoh pdiang ïa kiba bun ki jingujor na ki kmie ki kpa bad ki nongïalam shnong halor kane ka jingkem pang kynsan ki khynnah skul na ka jingsuba ngat bih na ka bam.
“Ha kane ka jingleit jurip na ka liang u ‘head boy’ u la pynthikna ba ki la don haduh 39 ngut ki khynnah skul kiba la leit shuti namar ka jingkem pang, katba palat 20 ngut kiwei pat la ong ba ki dang shu kem pang ha ka step sngi Balang,” ong u samla Pohsnem.
U la bynrap, “U Medical Officer ha PHC Rymbai u la pynthikna sha ka seng ba ka jingpynhiar kpoh hapdeng kine ki khynnah ka dei na ka jingkylla bih jong ka bam. U la pynsngew ruh ïa ka jingwan ba man ka por jong kiba pang sniehdoh kaba kdew shai ïa jingbym bat pyrkhing jong ki bor pynïaid skul ïa ka jingkhuid jingsuba.”
Ka JSU ka la kyntait ruh ïa ka jingtyrwa jong u Principal ban pynkynriah noh ïa ki khynnah skul hapoh ka 15 sngi da kaba ong ba kam sngew ïahap satia ne ka bym lah ban long.
“Ban pynkynriah ïa ki khynnah skul sha ka jaka ba dang pyntrei ïa ki kam ka buh ïa ka jingma kaba khraw ïa ka jingshngaiñ jong ki khynnah skul,” ong u samla Pohsnem haba bynrap “Ka jingpyntrei ïa ka phase-A (kumba T.50 klur) la dep ban pyntrei 95% hynrei kam pat don satia ïa ki jingdonkam ba kongsan kum ka bording bad ka jingpynpoi um. Ka phase-B (kumba T.20 klur) ka dang tang kumba 40%”.
Halor kane ka jingjia, ka JSU mardor ka la pyntip sha u Assistant Commissioner of Food Safety (Jowai), uba la bthah ïa u Food Safety Officer (FSO) ban pynlong ïa ka jingtohkit ha kane ka skul.
“Ka jingpeit bniah ba nyngkong jong u FSO ka la shim lypa ïa ki jinglong jingman hapoh ka campus ba kim pat biang bad bym khuid bym suba. Ka ‘kitchen mess’ ne jaka shet la shem ba ka long kaba jakhlia. Ki nongtrei kila trei khlem ki jingdeng ban ïada (mask/hairnets), ki paiñkhana ki don marjan ka jaka bam bad ka umdih la shem ba ka long kaba jngut. Tang artylli ki RO machine kila shakri ïa palat 200 ngut ki khynnah skul,” la ong ka seng.
Ka JSU kala ai por 15 sngi ïa ki bor ba dei khmih ba kin pynbeit ïa ka jingkhuid ka jingsuba bad ka umbam umdih kaba khuid ha kane ka campus ba mynta.
“Ka jingbym shimkhia halor kine ki jingdawa kan pynbor ïa ka seng ba kan shim da kiwei pat ki sienjam ba tyngeh na ka bynta ban ai jingïada ïa ki khynnah skul,” bynrap u Education Secretary.
