Shillong, Naiwieng 26
Ka Sorkar Jylla kala ai jingmynjur ïa ka bynta kaba ar jong ka Meghalaya Logistics and Connectivity Improvement Project (MLCIP) ban shna pynheh ïa ki surok bad ki jingtei kiba kongsan ha ka jinglut jingsep ba kot $300 million (kumba T.2,450 klur).
Haba kren sha ki lad pathai khubor hadien ba la wai ka jingïalang jong ka Kynhun Myntri kaba la long ha ka sngi Balang ha Nan Palok, u Myntri Rangbah ka Jylla Conrad K Sangma u la ong, na ka jingmang pisa jong ka projek baroh kawei, ka $240 million kan dei ka ram na ka World Bank ha kaba 90% yn siew da ka Sorkar India bad 10% da ka Sorkar Meghalaya.
U la ong ba 20% na ka jinglut ha ki projek, kumba $60 million kan dei ka synñiang na ka Jylla.
“Ki jingïakren bad donkam bad ki jingïapynbeit bad ka World Bank kila sdang bad haba pynshong nongrim ïa kane, la shna ïa ka DPR bad mynta ka tnad Planning kala wanrah sha ka Kynhun Myntri ban ai jingmynjur ha ka ban pynïaid shakhmat ïa kine ki jingïapynbeit bad ka World Bank,” ong u Conrad.
“Kane ka dei ka jingïapynbeit bad ngi la ai jingmynjur ban pynïaid shakhmat ïa ki projek ka World Bank. Ka jingmang pisa baroh ka long T.2450 klur haba phai sha ka pisa baroh ba la mang sha ki projek surok bad kiwei ki jingtei ba donkam,” u la ong.
