Shillong, Naiwieng 26
Ka Sorkar Jylla ka la mynjur ïa ka jingtyrwa ban shim ïa ki pynthor kba ha shnong Mawkhanu, New Shillong Township, na ki 17 ngut ki nongrep kiba la mynjur ban die ïa ki jaka jong ki na ka bynta ban wanrah ki projek kam pynroi.
Haba kren sha ki lad pathai khubor hadien ba la wai ka jingïalang ka Kynhun Myntri kaba la long ha ka sngi Balang ha Nan Palok, u Myntri Rangbah ka Jylla u Conrad K Sangma u la ong, ka jingshim jaka ka dei ka jingmih na ka jingïakren kaba la long bunsien bad ki nongrep, kiba ha kaba sdang ki la artatien ban ïakhlad noh bad ka jaka jong ki.
“Ki nongrep mynta ki la mynjur ban die beit ïa ka jaka sha ka Sorkar, haba ïohi ïa ki projek kiba heh kiba dang ïaid ha katei ka thaiñ,” la ong u Conrad bad bynrap ba ka Kynhun Myntri ka la mynjur ïa katei ka jingdie ïa ki pynthor kba.
Ka jingshim ïa kane ka jaka la khmih lynti ba kan pynsuk ïa ka jingpynheh ïa ki kam pynroi ha ka thaiñ New Shillong Township.
Ha kawei pat ka khubor, ka Sorkar Jylla ka la mynjur ban thied ïa ka jaka na ka bynta ban shna ïa ki jingtei na ka bynta ki bor pynïaid district (administrative setup) jong ka North Garo Hills district, da kaba pyndonkam ïa ka pisa kaba la mang ha u snem 2016-17.
Ha kaba ïadei bad kane, u Conrad u la ïathuh ba ka bor synshar district ka la ithuh bad thied ïa katei ka jaka da kaba pyndonkam ïa ka pisa kaba 5 klur tyngka kaba la mang na ka bynta ban shim jaka, kaba la sahkut ha u Deputy Commissioner naduh katei ka por.
“Kane ka dei ka jingtyrwa kaba la rim, bad mynta ngi dang ai ïa ka jingmynjur ban ïaid shakhmat bad ka jingthied,” la ong u Conrad bad bynrap ba ïa katei ka jaka yn pyndonkam na ka bynta ban buh ïa ki jingtei na ka bynta ki bor pynïaid ïa ka synshar khadar ha ka district.
